ფინეთის პრეზიდენტმა ალექსანდერ სტუბმა დაამტკიცა გადაწყვეტილება, რომელიც თითქმის 200 მილიონი ევროს მოცულობის სამხედრო დახმარების ახალი პაკეტის გამოყოფას ითვალისწინებს. ამის შესახებ ქვეყნის თავდაცვის მინისტრმა ანტი ჰიაკკიანენმა განაცხადა. "ჩვენ აღმოვუჩენთ ზუსტად ისეთ მხარდაჭერას, რომელიც უკრაინას ფრონტზე მწვავე სიტუაციაში თავის დაცვაში დაეხმარება. ჩვენზე, ევროპელებზეა, დამოკიდებული, თუ როგორ განვითარდება უსაფრთხოება ევროპაში. უკრაინის დამოუკიდებლობისა და თავდაცვისუნარიანობის უზრუნველყოფა ახლა მთელი ამ საქმის არსებითი ნაწილია", - განაცხადა თავდაცვის მინისტრმა. ცნობილია, რომ ეს ფინეთის მიერ უკრაინისთვის გადაცემული სამხედრო ტექნიკის უკვე 27-ე პარტიაა. ამ პარტიის ფარგლებში ფინეთის მიერ გამოყოფილი აღჭურვილობის ღირებულება დაახლოებით 198 მილიონ ევროდ არის შეფასებული. მთლიანობაში კი ნატოს წევრმა ფინეთმა რუსეთთან ომში მყოფ უკრაინას 2,5 მილიარდი ევროს სამხედრო ტექნიკა და აღჭურვილობა გადასცა. ნოემბრის ბოლოს დანიის, ესტონეთის, ფინეთის, ლატვიის, ნორვეგიის, პოლონეთის, შვედეთისა და ფინეთის ლიდერებმა პირობა დადეს, რომ მეტ საბრძოლო მასალას მიაწოდებდნენ და კიდევ უფრო გააძლიერებდნენ უკრაინის მხარდაჭერას. ასევე ნახეთ ფინეთის პრემიერის თქმით, რუსეთი „დასავლეთთან ხანგრძლივი კონფლიქტისთვის“ ემზადება ასევე ნახეთ ფინეთის პარლამენტმა მხარი დაუჭირა ქვეყნის ნატოში გაწევრიანებას ...