ზუგდიდის მუნიციპალიტეტის სოფელ ინგირის საბავშვო ბაღში დაპირისპირება იყო. სააღმზრდელო დაწესებულების თანამშრომელთა და მოსწავლეთა მშობლების ნაწილმა გააპროტესტა ადგილზე ზუგდიდის მერიას დაქვემდებარებული ააიპ-ის, სკოლამდელ სააღმზრდელო დაწესებულებათა მართვის ცენტრის წარმომადგენლების მისვლა. ცენტრის დირექტორის მოადგილემ და იურისტმა თანამშრომლებს ახალი ხელშეკრულებები მიუტანეს, რომლის თანახმადაც, ბაღში დასაქმებული 22 თანამშრომლიდან 11-ს მუშაობის ვადა ნახევარი წლით გაუხანგრძლივდა, 9-ს კი - მხოლოდ ერთი თვით. მათ შორის ბაღის გამგეს, ხათუნა გოგუასაც. ის ეჭვობს, რომ მერიას დაქვემდებარებული ცენტრის ეს გადაწყვეტილება პოლიტიკურია, რადგან შეეხო მხოლოდ ოპოზიციურად განწყობილ თანამშრომლებს. ბაღის გამგეს ამ ეჭვს უმყარებს ისიც, რომ საპარლამენტო არჩევნებამდე ცოტა ხნით ადრე სააღმზრდელო დაწესებულებათა მართვის ცენტრის თანამშრომელმა გააცნო სია, რომელშიც ბაღის ოპოზიციურად განწყობილი თანამშრომლები შედიოდნენ. ამ სიაში იყვნენ ისინი, ვისაც 1 მარტიდან გათავისუფლებას უპირებენ. „დაზუსტებით არ ვიცი, რას უკავშირდება მათი ეს გადაწყვეტილება. ამაზე მოგვიანებით გავაკეთებ კომენტარს. მე საპროტესტო აქციებზე დავდივარ ...რა თქმა უნდა, არ გამოვრიცხავ, რომ ამასაც უკავშირდებოდეს... მე მანამდე [წინასაარჩევნო პერიოდში] დამირეკა ვიღაცამ და მითხრა, მართვის ცენტრიდან ვარო... ის სახელები და გვარები, ვინც ამ სიაში მოხვდა ახლა, ისინი ჩამომისახელა. მითხრა ნომრები [ოპოზიციური პარტიების საარჩევნო ნომრები], რომლებიც მიწერილი იყო ამ სახელებზე და გვარებზე... მითხრა წაგიკითხავ ახლა ამ სიას და მითხარი, ხარ თუ არა შენ პასუხისმგებელი ამ ადამიანებზეო. მე ვუთხარი, ეს ნორმალური საქციელია? განა ასე ვაშენებთ ჩვენ დემოკრატიას-მეთქი? მეც ამომიკითხა სიაში. "შენო? შენ რას აპირებო?"... ვუთხარი, ჯერ ვფიქრობ-მეთქი. მე მართლა არ ვიცი, ვინ ვის მისცა ხმა. აქ ყველა ჩვეულებრივი მოქალაქეები ვართ. არც ერთი არ ვართ პოლიტიკოსები. არც ერთ პარტიასთან არ მაქვს ურთიერთობა. კი, აქციებზე ვიყავი. ჩემი შვილის ტოლა ბავშვებს ძვლებში ამტვრევდნენ და ვიყავი აქციებზე, კი ბატონო. ესეც მითხრეს, "შენო აქციებზე ყოფილხარო“, - თქვა ხათუნა გოგუამ. ბაღის ჯერ კიდევ მოქმედმა გამგემ რადიო თავისუფლებას ასევე განუმარტა, რომ გასული წლის 24 დეკემბერს გააცნეს თანამშრომლებს ახალი ხელშეკრულებები და გააფრთხილეს, რომ ნაწილი მუშაობის გაგრძელებას მხოლოდ პირველ თებერვლამდე შეძლებდა. ამის შემდეგ შედგა შეხვედრა ცენტრის დირექტორ ხათუნა თოლორაიასთან. როგორც ხათუნა გოგუა ამბობს, შეხვედრის შემდეგ მას და დანარჩენ თანამშრომლებსაც იმედი მიეცათ, რომ გაუგებრობა აღმოიფხვრებოდა და მათაც ექვსთვიან ხელშეკრულებებს გაუფორმებდნენ. დღეს კი საპირისპიროში დარწმუნდნენ, როცა ცენტრის დირე...