გერმანიის ქალაქებში ათიათასობით ადამიანი გავიდა ქუჩაში, რათა პროტესტი გამოეხატა მემარჯვენე ექსტრემიზმისა და პარტია “ალტერნატივა გერმანიისთვის” (AfD) პოლიტიკური თანამშრომლობის წინააღმდეგ. პოლიციის თანახმად, ბერლინში, სამთავრობო უბანში, 160 ათასმა ადამიანმა გაიარა. დემონსტრაციები გაიმართა ლოზუნგით: „ზნეობრივი ადამიანების ამბოხება - დემონსტრაცია “ბრანდმაუერისთვის” (გერმ. ხანძარსაწინააღმდეგო კედელი. გადატან. პოლიტ. მკაფიო და გადაულახავი ზღუდე დემოკრატიულ პარტიებსა და ექსტრემისტულ და რადიკალურ ძალებს შორის). დემონსტრანტების პროტესტი მიმართული იყო მემარჯვენე-ცენტრისტული ქრისტიან-დემოკრატიული პარტიის ლიდერისა და მიგრაციის მკაცრი ნორმების თაობაზე მისი წინადადების წინააღმდეგ ბუნდესტაგში, რომელსაც ემხრობა ულტრამემარჯვენე პარტია AfD. გაბრაზებულმა დემონსტრანტებმა ჰამბურგში, კიოლნსა და ლაიფციგში განაცხადეს, რომ ფრიდრიხ მერცმა და მისმა ქრისტიან-დემოკრატებმა დაარღვიეს გერმანიის ყველა დემოკრატიული პარტიის ნაციზმის შემდგომ პერიოდში დადებული დაუწერელი პირობა, არასდროს მიეღოთ პარლამენტში რომელიმე ნორმა ან რეზოლუცია, რომელსაც ემხრობიან ულტრამემარჯვენე, ნაციონალისტური პარტიები, როგორიცაა "ალტერნატივა გერმანიისთვის." გასულ კვირაში მერცმა პარლამენტში შეიტანა წინადადება, რომელსაც არ აქვს იურიდიული ძალა და მოუწოდა გერმანიას, უკან გააბრუნოს მის საზღვრებთან მყოფი მიგრანტების უმეტესობა. ეს წინადადება გავიდა AfD-ს მხარდაჭერის წყალობით. თუმცა 31 იანვარს გერმანიის პარლამენტმა ხმების მცირე სხვაობით უარყო მიგრაციის წესების გამკაცრების მხარდამჭერი კანონპროექტი. არსებობდა იმის საფრთხე, რომ ეს შეიძლებოდა გამხდარიყო პირველი კანონპროექტი, რომელიც ულტრამემარჯვენე პარტიის დახმარებით იქნებოდა მიღებული. მაგრამ ის მაინც გახდა მომავალ არჩევნებზე ულტრამემარჯვენე კანდიდატების მიმართ დამოკიდებულების შესახებ დავის საგანი. დემონსტრანტებმა და მემარცხენე მიმართულების პოლიტიკოსებმა მერცი დაადანაშაულეს ტაბუს დარღვევაში და AfD-ს წინააღმდეგ მთავარი პარტიების "დამცავი კედლის"- “ბრანდმაუერისთვის” - საფრთხის შექმნაში. თუმცა მერცი ამტკიცებს, რომ მისი პოზიცია არ შეცვლილა და რომ მას არ ჰქონია და არ ექნება თანამშრომლობა AfD-სთან. ასობით მომიტინგემ დროებით დაბლოკა ქრისტიან-დემოკრატების ოფისები სხვადასხვა ქალაქში, ხოლო 2 თებერვალს, დღისით, ბერლინში 20 000-მდე ადამიანმა მოაწყო დემონსტრაცია. კიოლნში ხალხმა პროტესტი გამოხატა მდინარე რაინში, 350 გემზე, იტყობინება გერმანიის საინფორმაციო სააგენტო dpa. გემები გამწკრივდნენ მთელი ქალაქის გასწვრივ, დემონსტრანტებს ხელში ეჭირათ პლაკატები ლოზუნგებით: "არა რასიზმს" და "დემოკრატიისა და მრავალფეროვნებისთვის". ქრისტიან-დემოკრატების მიგრაციის პო...