პრესსამსახურის ცნობით, მას შემდეგ, რაც თანამდებობის პირთა დეკლარაციების შევსება-გამოქვეყნებისა და საჯარო სამსახურში დასაქმებულთა ეთიკისა და კეთილსინდისიერების კონტროლის ნაწილი ანტიკორუფციულ ბიუროს გადაეცა, საჯარო სამსახურის ბიუროს ფუნქციების მესამედი გამოაკლდა. თუმცა ბოლო ორი თვეა, დეკლარაციები „ტექნიკური ხარვეზის“ გამო აღარ ქვეყნდება. ასევე ნახეთ ანტიკორუფციულმა ბიურომ რადიო თავისუფლებას საჯარო მოხელეების დეკლარაციები არ მისცა ამავე ინფორმაციის მიხედვით, „საჯარო სამსახურის ბიუროს“ გაუქმების შემდეგ „დარჩენილ ფუნქციებს მთავრობის ადმინისტრაციის შესაბამისი დეპარტამენტები განახორციელებენ“. რადიო თავისუფლება პრესსამსახურთან ცდილობს გაარკვიოს, რამდენ ადამიანს შეუწყდება ხელშეკრულება 1 აპრილიდან. 2022 წლის 30 ნოემბერს პარლამენტმა „საჯარო დაწესებულებაში ინტერესთა შეუთავსებლობისა და კორუფციის შესახებ“ კანონში ცვლილებები შეიტანა და შეიქმნა საჯარო სამართლის იურიდიული პირი - ანტიკორუფციული ბიურო. სამსახურის უფროსი პრემიერ-მინისტრმა დანიშნა. ვენეციის კომისიის დასკვნაში ნათქვამი იყო, რომ ბიუროს ხელმძღვანელის დანიშვნა და გათავისუფლება მეტწილად პრემიერ-მინისტრის კომპეტენციაა, რაც პრობლემურია. ანტიკორუფციული ბიუროს საქმიანობასთან დაკავშირებით კითხვები გაჩნდა 2024 წლის საპარლამენტო არჩევნების წინ. ბიუროს ხელმძღვანელმა სადამკვირვებლო ორგანიზაცია „საერთაშორისო გამჭვირვალობა-საქართველო“ „გაცხადებული საარჩევნო მიზნის მქონე სუბიექტად“ გამოაცხადა. პრემიერ-მინისტრ ირაკლი კობახიძის საჯარო განცხადების შემდეგ კი უწყების ხელმძღვანელმა რაჟდენ კუპრაშვილმა საკუთარი გადაწყვეტილება გააუქმა. ამ დრომდე მედია არ ფლობს ინფორმაციას, იკვლევს თუ არა და რომელი სახელმწიფო უწყება იკვლევს კორუფციის რისკებს. ...