ევროკომისიის პრეზიდენტმა ურზულა ფონ დერ ლაიენმა ბრიუსელში, ევროკავშირის ლიდერთა არაფორმალური სამიტის დასრულების შემდეგ, 3 თებერვალს, გვიან ღამით განაცხადა, რომ ევროკავშირი მზად არის მოვლენათა მსგავსი განვითარებისთვის. ფონ დერ ლაიენის თქმით, თუ ევროკავშირს უსამართლოდ ან უსაფუძვლოდ მოექცევიან, რეაგირება მტკიცე იქნება. ამასთან, ევროკომისიის პრეზიდენტი აუცილებლად მიიჩნევს ესკალაციის თავიდან აცილებას და დიალოგის სწრაფად დაწყებას. ფონ დერ ლაიენის განცხადებით, საბაჟო გადასახადები ბიზნესს ხარჯებს უზრდის, აზიანებს დასაქმებულებსა და მომხმარებლებს და ხელს უწყობს ინფლაციას. აშშ-ის პრეზიდენტმა დონალდ ტრამპმა გასული კვირის ბოლოს არ გამორიცხა, რომ მალე საბაჟო გადასახადებს დაუწესებს ევროკავშირიდან იმპორტირებულ საქონელს. ტრამპის განცხადებით, ევროკავშირთან მიმართებით სავაჭრო დეფიციტმა 300 მილიარდ დოლარს მიაღწია, რადგან, მაშინ როცა აშშ ევროკავშირისგან ყველაფერს ყიდულობს, ისინი არ ყიდულობენ თითქმის არაფერს, მათ შორის არც ამერიკულ ავტომანქანებს და არც სოფლის მეურნეობის პროდუქციას. ასევე ნახეთ აშშ 30 დღით აჩერებს კანადისა და მექსიკისთვის ახალი საბაჟო ტარიფების ამოქმედებას ამერიკის შეერთებული შტატების პრეზიდენტმა დონალდ ტრამპმა 1 თებერვალს გამოაცხადა, რომ 4 თებერვლიდან დამატებით 10%-იანი საბაჟო გადასახადი დაწესდება ჩინეთიდან იმპორტირებულ საქონელზე. ტრამპმა ანალოგიური გადაწყვეტილება მიიღო კანადისა და მექსიკის მიმართაც, თუმცა 3 თებერვალს, ამ ქვეყნების ლიდერებთან მოლაპარაკების შედეგად ახალი ტარიფების ამოქმედება 30 დღით შეაჩერა, მას შემდეგ, რაც კანადის პრემიერ-მინისტრმა და მექსიკის პრეზიდენტმა დაადასტურეს მზადყოფნა საზღვრების დაცვის გასაძლიერებლად. პრეზიდენტმა ტრამპმა ახალი ტარიფების შემოღების მიზეზებად დაასახელა შეერთებული შტატების საზღვრების დაცვის და ნარკოტიკების კონტრაბანდასთან ბრძოლის აუცილებლობა და სავაჭრო ბალანსის დეფიციტი. ჩინეთის ხელისუფლების მიერ დღეს, 4 თებერვალს, გამოცხადებული საპასუხო გადაწყვეტილებით, 10 თებერვლიდან აშშ-დან იმპორტირებულ ნავთობზე დაწესდება დამატებით 10%-იანი საბაჟო გადასახადი, ხოლო ნახშირსა და თხევად ბუნებრივ გაზზე - 15%-იანი. დამატებით 10%-ით დაიბეგრება ამერიკული ავტომანქანების იმპორტი. დღესვე ჩინეთის ვაჭრობის სამინისტრომ განაცხადა, რომ აშშ-ს დამატებითი საბაჟო გადასახადების ამოქმედებისთვის უჩივლა მსოფლიო სავაჭრო ორგანიზაციაში. ასევე ნახეთ ჩინეთმა ამერიკულ პროდუქციას დამატებითი საბაჟო გადასახადი დაუწესა ...