მოსამართლის გადაწყვეტილებით, უჩა აბაშიძე 5 წელს გაატარებს პატიმრობაში, მისი ცოლი კი - 4 წელს. იმის გამო, რომ საქმე პერსონალურ მონაცემებს შეიცავდა, იგი დახურულ სხდომებზე განიხილებოდა. შესაბამისად, სხდომებზე დასწრება ჟურნალისტებს არ შეეძლოთ, დეტალებზე ვერ საუბრობს ადვოკატიც. უჩა აბაშიძის საქმე უჩა აბაშიძის ბინაში პოლიცია 2024 წლის 9 მაისს გამოჩნდა და ჩხრეკა ჩაატარა. სახლთან მისი მხარდამჭერები შეიკრიბნენ. ღამით სამხედრო ბლოგერი პოლიციის ავტომობილში ჩასვეს და განყოფილებაში გადაიყვანეს. საგამოძიებო მოქმედებები ტარდებოდა ორი მუხლით დაწყებული გამოძიების ფარგლებში: 286-ე მუხლის მე-4 ნაწილით - შინაგან საქმეთა სამინისტროს, იუსტიციის სამინისტროსა და საქართველოს პარლამენტის ვებგვერდებზე განხორციელებული კიბერშეტევის ფაქტებზე, რაც გულისხმობს „კრიტიკული ინფორმაციული სისტემის სუბიექტის მიმართ ჩადენილ კომპიუტერული მონაცემის ან კომპიუტერული სისტემის ხელყოფას“ - დანაშაული ისჯება თავისუფლების აღკვეთით ოთხიდან შვიდ წლამდე. 236-ე მუხლის მე-3 ნაწილით, რაც ცეცხლსასროლი იარაღის და საბრძოლო მასალის უკანონო შეძენა-შენახვას გულისხმობს - დანაშაული ისჯება თავისუფლების აღკვეთით სამიდან ექვს წლამდე. მოგვიანებით შინაგან საქმეთა სამინისტრომ გაავრცელა ინფორმაცია, რომლიდანაც ირკვეოდა, რომ აბაშიძის ბინიდან ამოიღეს „უკანონო ცეცხლსასროლი იარაღი და საბრძოლო მასალა“. ეს შემდეგ არ დადასტურდა. три უჩა აბაშიძის დაკავებიდან ორ დღეში, 2024 წლის 11 მაისს, შინაგან საქმეთა სამინისტროში გამართულ ბრიფინგზე კრიმინალური პოლიციის დეპარტამენტის დირექტორმა თეიმურაზ კუპატაძემ განაცხადა, რომ ბრალდების მხარე უჩა აბაშიძესა და მის ცოლს, მარიამ იაშვილს, რომელიც გამოძიებამ 11 მაისს დააკავა, სისხლის სამართლის კოდექსის 157-ე პრიმა და 236-ე მუხლებით ჩადენილ დანაშაულებს ედავებოდა. ამ დანაშაულისთვის ოთხიდან შვიდ წლამდე პატიმრობა არის გათვალისწინებული. გამოძიება ირწმუნებოდა, რომ უჩა აბაშიძემ და მისმა ცოლმა „ერთად განიზრახეს სხვადასხვა პირთა პირადი ცხოვრების საიდუმლოს, კერძოდ კი, ინტიმური კავშირის ამსახველი მასალების უკანონოდ მოპოვება და შენახვა“. შინაგან საქმეთა სამინისტროს მტკიცებით, ამ მიზნით, მარიამ იაშვილის საცხოვრებელი ბინა აღჭურვილ იქნა შენიღბული ვიდეო-აუდიო ჩამწერი მოწყობილობებით, რომლებიც მუდმივ რეჟიმში ფარულად უზრუნველყოფდა ამ უკანასკნელის სხვადასხვა პირთან ინტიმური კავშირის უკანონო ჩაწერას. 2024 წლის 12 მაისს ცნობილი გახდა, რომ საქმის განხილვა თბილისის საქალაქო სასამართლოში დახურულ რეჟიმში წარიმართებოდა. ...