აშშ-ის კანონმდებლები 3 თებერვალს შეიკრიბნენ ვაშინგტონში, USAID-ის ცენტრალური ოფისის წინ ილონ მასკის, Tesla-სა და SpaceX-ის აღმასრულებელი დირექტორის, მსოფლიოს ყველაზე მდიდარი კაცის, როგორც თავად უწოდებენ, „უკანონო ქმედების“ დასაგმობად. მასკი პრეზიდენტ ტრამპის დავალების შესაბამისად, მთავრობის ეფექტიანობის დეპარტამენტის სახელით (DOGE) ეძებს ბიუჯეტის ხარჯვისა და ბიუროკრატიის შემცირების გზებს. დემოკრატმა კანონმდებლებმა საპროტესტო შეკრება გამართეს მას შემდეგ, რაც გავრცელდა ინფორმაცია, რომ აშშ-ის საერთაშორისო განვითარების სააგენტოს თანამშრომლებს 2 თებერვალს ელფოსტით აცნობეს, რომ შეეძლოთ მომდევნო დღეს სამსახურში არ გამოცხადებულიყვნენ და დაბლოკეს მათი წვდომა სამთავრობო ელფოსტასა და USAID-ის პლატფორმებზე, რაც სააგენტოს დაშლის პროცესზე მიუთითებდა. „შაბათ-კვირას USAID-ი დავამუშავეთ, როგორც ხის სათლელში”, – დაწერა მასკმა პლატფორმა X-ზე 3 თებერვალს. три კანონმდებლებმა სააგენტოს შენობის წინ გამართულ აქციაზე USAID-ის საქმიანობა დაიცვეს და განაცხადეს, რომ სააგენტოს დაშლის მცდელობა კონგრესის უფლებამოსილებას ეწინააღმდეგება. „ჩვენ არ გვყავს მთავრობის მეოთხე შტო სახელად ილონ მასკი, და ეს მალე ძალიან ნათელი გახდება“, – განაცხადა კონგრესმენმა ჯეიმი რასკინმა. მან ასევე აღნიშნა: „არ ვიცი, რა მოტივაცია აქვს მასკს, მაგრამ მას არაფერი აქვს საერთო იმ კანონებთან, რომლებიც აშშ-ის ხალხმა კონგრესის მეშვეობით მიიღო. ჩვენ ბოლომდე დავიცავთ USAID-ს“. დემოკრატმა სენატორმა კონექტიკუტიდან, კრის მერფიმ, USAID-ის დაშლის მცდელობა საკონსტიტუციო კრიზისად შეაფასა და პირობა დადო, რომ მას წინააღმდეგობას გაუწევს. „ხალხი წყვეტს, როგორ უნდა დაიხარჯოს მათი გადასახადების ფული. ამას ილონ მასკი ვერ გადაწყვეტს“, – თქვა მან რასკინთან ერთად გამოსვლისას. ეს არის მცდელობა, „მთავრობა გადასცენ რამდენიმე არარჩეულ მილიარდერსა და კორპორაციულ ინტერესებს. ჩვენ ამას არ დავუშვებთ“, - აღნიშნა მერფიმ. USAID-ი დამოუკიდებელი სამთავრობო სააგენტოა, რომელიც კონგრესმა 1961 წელს შექმნა და დღეისთვის მსოფლიოს გარშემო დაახლოებით 10 000 თანამშრომელი ჰყავს. სააგენტოს ყოველწლიურად ათეულობით მილიარდი დოლარი გადაეცემა კონგრესისგან, რათა დააფინანსოს პროგრამები მსოფლიოს ყველაზე გაჭირვებულ ქვეყნებში. პროგრამები მოიცავს სიღარიბის წინააღმდეგ ბრძოლას, ჯანდაცვის სფეროს განვითარებას, სტიქიური უბედურებების შემსუბუქებას, დემოკრატიის ხელშეწყობასა და ადამიანის უფლებების დაცვას. კონგრესის კვლევითი სამსახურის (CRS) ბოლო ანგარიშის მიხედვით, USAID-მა 2023 საფინანსო წელს მართა 40 მილიარდ დოლარზე მეტი თანხა, რომელიც დაახლოებით 130 ქვეყანაში სხვადასხვა პროექტის დასაფინანსებლად გამოიყო. დახმარების უმსხვილესი მიმღებები იყვნენ უკრაინა, ეთიოპია და იორდანია, ას...