რუსეთმა სარაკეტო იერიში მიიტანა უკრაინის აღმოსავლეთის ქალაქ იზიუმზე. ხარკოვის ოლქის აღმოსავლეთში, ფრონტისპირა ზოლში მდებარე ქალაქზე დარტყმას, სულ მცირე, ხუთი პირი ემსხვერპლა, დაშავდა ათეულობით ადამიანი, - იტყობინება საოლქო სამხედრო ადმინისტრაციის ხელმძღვანელი. „მტრის თავდასხმა იზიუმზე. წინასწარი მონაცემებით, ოკუპანტებმა ბალისტიკური რაკეტა გამოიყენეს“, - დაწერა ოლეჰ სინეგუბოვმა Telegram-ზე. მისი სიტყვებით, რუსეთის არმიამ დაარტყა სტრატეგიულად მნიშვნელოვანი ქალაქის ცენტრალურ ნაწილს. ქალაქი მნიშვნელოვანი სატრანსპორტო კვანძია, რომელზეც მომარაგების გზები გადის. თავიდან იტყობინებოდნენ 17 დაშავებულის შესახებ, მაგრამ მოგვიანებით მათი რიცხვი გაიზარდა 38-მდე, მათ შორის 15 წლის გოგონაა. ადგილობრივი ხელისუფლება აზუსტებს, რომ რაკეტა მოხვდა ადმინისტრაციულ შენობას და დააზიანა სხვა, იქვე მდებარე ადმინისტრაციული ობიექტი, ასევე მაღალსართულიანი სახლები. საოლქო სამხედრო ადმინისტრაციის თანახმად, ამ რაიონში სამხედრო ობიექტები არაა განთავსებული. უკრაინის პრეზიდენტმა, ვოლოდიმირ ზელენსკიმ განაცხადა, რომ ინციდენტის ადგილზე გრძელდება სამაშველო სამუშაოები. მან სამძიმარი გამოუცხადა დაღუპულების ოჯახებს. „ასეთი სისასტიკე დაუშვებელია“ - წერს ზელენსკი Telegram-ზე, „საჭიროა რუსეთზე მოვახდინოთ ზეწოლა ყველა საშუალებით, სამხედრო ძალით, სანქციებითა და დიპლომატიური ძალისხმევით, რათა შეწყდეს ეს ტერორი და დავიცვათ ადამიანების სიცოცხლე.“ ასევე ნახეთ უკრაინაში დააკავეს გენერლები, რომლებიც ხარკოვის დაცვას ხელმძღვანელობდნენ ...