„ამ განკარგულებით ქალების სპორტთან ომი დასრულებულია“, - განაცხადა ტრამპმა 5 თებერვალს თეთრ სახლში, სადაც განკარგულებას ხელი მოაწერა ათეულობით სპორტსმენი ქალისა და გოგოს თანდასწრებით. აშშ-ის პრეზიდენტის მიერ ხელმოწერილი დოკუმენტი ითვალისწინებს სახელმწიფო დაფინანსების გაუქმებასაც იმ სკოლებისა და უნივერსიტეტებისთვის, რომლებიც ტრანსგენდერებს ქალთა შეჯიბრებებში მონაწილეობის უფლებას მისცემენ. ასევე ნახეთ ტრამპი, “მილიარდების დასაზოგად”, საგარეო დახმარების სააგენტოს დაშლას აპირებს დონალდ ტრამპს სურს, რომ ქალთა შეჯიბრებებში ტრანსგენდერების მონაწილეობის აკრძალვა გავრცელდეს 2028 წლის ზაფხულის ოლიმპიადაზეც, რომელსაც ლოს-ანჯელესი უმასპინძლებს და სახელმწიფო მდივანს დაავალა, ეს პოზიცია აცნობონ საერთაშორისო ოლიმპიურ კომიტეტს. ტრამპი, რომელიც კომიტეტს რაიმე გადაწყვეტილების მიღებას ვერ აიძულებს, აცხადებს, რომ ტრანსგენდერ სპორტსმენებს ვიზას არ მისცემენ. როგორც აშშ-ის პრეზიდენტმა განაცხადა, მისი ადმინისტრაცია არ აპირებს უმოქმედოდ უყუროს, როგორ სცემენ და იმარჯვებენ მამაკაცები ქალ სპორტსმენებზე. 5 თებერვალს, განკარგულების ხელმოწერამდე, დონალდ ტრამპმა გაიმეორა ადრეც ნათქვამი, რომ არავის დაავიწყდება პარიზის შარშანდელი ოლიმპიადა, რომელზეც სინამდვილეში მოკრივე მამაკაცი ქალ მეტოქეს სასტიკად გაუსწორდა და ოქროს მედალი მოიპოვა. ტრამპი გულისხმობდა ალჟირელ იმან ხელიფს. ამერიკული მედიასაშუალებების ნაწილი, მათ შორის ტელეკომპანია CNN-ი ხაზს უსვამს, ეს განცხადება სიმართლე არ არის, რადგან იმან ხელიფი ქალადაა დაბადებული. ეს დადასტურებული აქვს საერთაშორისო ოლიმპიურ კომიტეტს. ასევე ნახეთ ალჟირელი მოკრივე ქალი ყველას მოუწოდებს, შეწყვიტონ სპორტსმენების დევნა 2025 წლის 20 იანვარს, ინაუგურაციის დღეს, დონალდ ტრამპმა გამოაცხადა, რომ ამიერიდან აშშ-ის სახელმწიფო პოლიტიკა აღიარებს მხოლოდ ორ სქესს - მამაკაცს და ქალს. ერთ-ერთი პირველი განკარგულებით, რომელსაც პრეზიდენტმა ტრამპმა ხელი თეთრ სახლში დაბრუნებისთანავე მოაწერა, ტრანსგენდერებს არმიაში სამსახური აეკრძალათ. კალიფორნიის უნივერსიტეტის სამართლის სკოლის მონაცემებით, აშშ-ში დაახლოებით 1,6 მილიონი ტრანსგენდერია, რომელთა ასაკი 13 წლიდან იწყება. შეერთებული შტატების სამედიცინო ასოციაცია მხარს უჭერს ნებისმიერ სამედიცინო ჩარევას, რომელიც ადამიანს დაეხმარება იმ სქესში გადასვლაში, რომელსაც თავს მიაკუთვნებს. მედიკოსების თანახმად, ეს მნიშვნელოვნად ამცირებს თვითმკვლელობების მცდელობებსა და დეპრესიას. ...