ადვოკატ ელგუჯა ავსაჯანიშვილის ინფორმაციით, სტუდენტები აჩი გოჩიტაშვილი, ლუკა ხიზაძე და გიორგი ბარბაქაძე 6 თებერვლის ღამის 3 საათისთვის დააკავეს ჭავჭავაძის გამზირზე ადმინისტრაციული წესით. მათ ადმინისტრაციული კოდექსის 173-ე მუხლით გათვალისწინებულ დარღვევას ედავებიან, რაც სამართალდამცველის კანონიერი მოთხოვნისადმი დაუმორჩილებლობას გულისხმობს. ადვოკატის თქმით, გამოძიების ვერსიით, ისინი სტენსილების გაკეთების დროს დააკავეს. აჩი გოჩიტაშვილი და ლუკა ხიზაძე თბილისის სახელმწიფო უნივერსიტეტის სტუდენტები არიან, სტუდენტია გიორგი ბარბაქაძეც. ადვოკატის თქმით, მან უკვე მოინახულა თავისი დაცვის ქვეშ მყოფები დიღმის წინასწარი დაკავების იზოლატორში. მათ ძალადობის კვალი არ ეტყობათ. „შსს-ს მივმართავთ, კამერები წარმოგვიდგინოს და დაგვიდასტუროს, რომ ჩემი დაცვის ქვეშ მყოფი რაღაცას წერდა. არ ვადასტურებ, რომ პულვერიზატორი ჰქონდა, მაგრამ ჰიპოთეტურად რომ ვიმსჯელოთ, პულვერიზატორის ქონა არ არის აკრძალული. უკვე ვხედავთ, რომ სისტემა იმდენად რეპრესიულ პოლიტიკას ატარებს, რომ ადამიანს იჭერს იმის გამო, რომ კონკრეტულ ტერიტორიაზე იმყოფებოდა. ბატონმა გიორგიმ განმიცხადა ის, რომ მას არანაირი წარწერა არ გაუკეთებია, პოლიცია როგორც კი მოვიდა, 2 თებერვალს იყო პოლიციის მხრიდან ნაცემი და შეშინებული და ასევე იმ მომენტში დააკავეს, როცა ჭავჭავაძეზე იმყოფებოდა. ბატონი გიორგი აცხადებს, რომ მას არაფერი არ დაუწერია და უბრალოდ ადგილზე ყოფნის გამო დააკავეს. რაც შეეხება ბატონ არჩილს, მან თქვა, რომ დააკავეს ფაქტთან დაკავშირებით, მაგრამ წარწერებთან დაკავშირებით ვერაფერს მოგახსენებთ“, – თქვა მან. 71 დღეა, საქართველოში ახალი არჩევნების ჩატარებისა და აქციებზე დაკავებულების გათავისუფლების მოთხოვნით პროევროპული აქციები მიმდინარეობს. დაკავებული სტუდენტები ამ აქციების მონაწილეები არიან. ...