რუსეთის საგარეო საქმეთა სამინისტრომ 6 თებერვალს განაცხადა, რომ აშშ-მა აუცილებლად უნდა ჩამოაყალიბოს თავისი პოლიტიკა უკრაინაში კონფლიქტის შეწყვეტის შესახებ და რომ მოსკოვი შემდეგ შეძლებს დააფუძნოს თავისი პოზიცია აშშ-ის კონკრეტულ ქმედებებზე. ორივე მხარის ოფიციალური წარმომადგენლების საჯარო განცხადებების თანახმად, აშშ-ის პრეზიდენტს, დონალდ ტრამპსა და რუსეთის პრეზიდენტს, ვლადიმირ პუტინს, ტელეფონით არ უსაუბრიათ ტრამპის ინაუგურაციის შემდეგ. რუსეთის სახელმწიფო საინფორმაციო სააგენტო РИА მაღალი რანგის კანონმდებლის ნათქვამზე დაყრდნობით 6 თებერვალს იტყობინებოდა, რომ პუტინის და ტრამპის შეხვედრის მომზადება „წინწასულ სტადიაშია“. რუსეთის საგარეო საქმეთა სამინისტროს ოფიციალურმა წარმომადგენელმა მარია ზახაროვამ განაცხადა, რომ მოსკოვმა ვაშინგტონის ბევრი ნათქვამი და განცხადება მოისმინა უკრაინის შესახებ, მაგრამ ჯერ არაა ნათელი, კონკრეტულად რას სთავაზობს აშშ, როცა საქმე უკრაინაში კონფლიქტის დასრულების შეთანხმების დადებას ეხება. „რაც შეეხება აშშ-ის როლს ან შესაძლო როლს უკრაინის ირგვლივ კრიზისის მოგვარებაში, კიდევ ერთხელ გავიმეორებ: ყველაფერი დამოკიდებული იქნება კონკრეტულ ქმედებებზე და ახალი ადმინისტრაციის გეგმებზე, რომლებიც მათში აისახება“, - განაცხადა ზახაროვამ მოსკოვში გამართულ ბრიფინგზე. „ჯერჯერობით ბევრი სიტყვა და ბევრი განცხადებაა. (მაგრამ) არ არის სიცხადე იმაში, თუ რა ნაბიჯებს დგამს (აშშ), ამიტომ ნაადრევი იქნებოდა საუბარი მოლაპარაკებების პერსპექტივაზე ან რაიმეზე ამ კონტექსტში.” „რაც შეეხება ვაშინგტონს, მათ, ალბათ, უნდა ჩამოაყალიბონ თავიანთი პოლიტიკა და ჩვენ თვითონ ვიმოქმედებთ, მათი კონკრეტული ნაბიჯებისა და ქმედებების საფუძველზე“, - თქვა მან. ტრამპმა და კიტ კელოგმა, ტრამპის სპეციალურმა წარმომადგენელმა უკრაინასა და რუსეთში, განაცხადეს, რომ მუშაობენ უკრაინაში საომარი მოქმედების შეწყვეტის შეთანხმების გეგმაზე, მაგრამ ჯერ არ გაუმხელიათ დეტალები იმაზე, როგორი შეიძლება იყოს ეს გეგმა. ასევე ნახეთ ტრამპის შეთავაზება უკრაინას - ეგოიზმი თუ საქმიანი წინადადება? ...