23 იანვარს ცეცხლი გაუჩნდა რუსულ სადაზვერვო გემს, "კილდინს", როდესაც ის სირიის სანაპიროსთან დაცურავდა. მას მართვის პრობლემები შეექმნა. მომხდარის შესახებ Associated Press-ი იტყობინება - პარასკევს, 7 თებერვალს, მან გაავრცელა "კილდინის" სხვა გემთან მოლაპარაკებების აუდიოჩანაწერი, ასევე ფოტოები და ვიდეოები, რომლებშიც ჩანს, როგორ ადის კვამლი გემის ზემოთ. არსებული ინფორმაციით, სააგენტომ ეს მასალები მიიღო სამხედროებისგან, კერძოდ, ნატოს ერთ-ერთი იმ ქვეყნის წარმომადგენლებისგან, რომლის გემიც ინციდენტის დროს ახლოს იმყოფებოდა. რუსეთის ხელისუფლებას მანამდე არ გაუვრცელებია ინფორმაცია გემ "კილდინზე" მომხდარ ინციდენტზე. Associated Press-ის მასალაში ნათქვამია, რომ რუსული ხომალდის ეკიპაჟმა უარი თქვა ნატოს გემის დახმარებაზე. სტატიის თანახმად, შავი ზღვის ფლოტის საშუალო სადაზვერვო ხომალდი "კილდინი" ხმელთაშუა ზღვაში იმყოფებოდა თურქეთის საზღვაო ძალების წვრთნების მონიტორინგისთვის. გაურკვეველი მიზეზების გამო, გემზე ხანძარი გაჩნდა. სავარაუდოდ, ეკიპაჟი ოთხი საათის განმავლობაში ებრძოდა ხანძარს და საბოლოო ჯამში, საკუთარი ძალებით შეძლო ცეცხლის ჩაქრობა. ვრცელდება ინფორმაცია, რომ ახლა "კილდინი" კვლავ სირიის სანაპიროზეა, ტარტუსის პორტთან, სადაც მდებარეობს რუსული ბაზა. ბოლო ინფორმაციით, რუსული გემები ტარტუსიდან სამხედრო ტექნიკის ექსპორტს ახორციელებენ. მანამდე გავრცელდა ინფორმაცია, რომ სირიის პორტის დატოვების შემდეგ პრობლემები ჰქონდა რუსულ გემს, "სპარტას". რუსეთის თავდაცვის სამინისტროს ამ სტატიაზე კომენტარი ჯერ არ გაუკეთებია. კრემლის სპიკერმა დიმიტრი პესკოვმა "ასოშიეტიდ პრესთან" კომენტარში თქვა, რომ რუსეთის საზღვაო ძალების მდგომარეობა არ შეიძლება შეფასდეს ცალკეული ინციდენტით. ასევე ნახეთ რუსეთი, სავარაუდოდ, ამთავრებს სამხედრო ტექნიკის გატანას სირიიდან ...