შსს-ის მიერ 7 თებერვალს გავრცელებული ცნობის თანახმად, 26 ადამიანი დააკავეს თბილისში, იმერეთსა და სამეგრელოში. მათ სხვადასხვა ბრალდებები აქვთ: ექვს მათგანს წაყენებული აქვს „ქურდული სამყაროს“ წევრობის ბრალდება. სამინისტროს ცნობით, მათ შორის არიან ადამიანები ზედმეტსახელებით „პაჭო“, „მესსტო“ და „კოჭო“; 11 პირი დაკავებულია „ქურდულ შეკრებაში მონაწილეობის" ბრალდებით. მათ შორის არიან ადამიანები ზედმეტსახელებით „კარატე“, „ბუძგა“ და „ტეკია“; ექვსი მათგანი დაკავებულია „ქურდული სამყაროს“ საქმიანობის მხარდაჭერის“ ბრალდებით; სამი ადამიანი დაკავებულია „ქურდული სამყაროს წევრისთვის მიმართვის“ ბრალდებით. ამ 26 ადამიანის გარდა, შსს წერს, რომ კიდევ ერთი ადამიანია დაკავებული - ცეცხლსასროლი იარაღის უკანონო შეძენა-შენახვის ბრალდებით. ვინ არიან „კანონიერი ქურდები“ „კანონიერი ქურდობის“ გამო ბრალი დაუსწრებლად წარედგინა საზღვარგარეთ მყოფ რამდენიმე პირს. შსს მხოლოდ მათს სახელებს წერს საჯაროდ. ესენი არიან: ჯეირან კინწურაშვილი, დაბადებული 1977 წელს; კაკო ტუღუში, მეტსახელად "ენცო", - დაბადებული 1987 წელს; მამუკა ჩხაბერიძე, მეტსახელად „მამუკა ხონსკი“, - დაბადებული 1976 წელს. ბრალდებები 15 წლამდე პატიმრობას ითვალისწინებს. გამოძიების დეტალები შინაგან საქმეთა სამინისტრო აცხადებს, რომ ფარული გამოძიება რამდენიმე თვის განმავლობაში გრძელდებოდა. პოლიციის პრესცენტრის ცნობით, „ქურდული სამყაროს“ წევრები და მხარდამჭერები მოქალაქეთა შორის ფინანსურ დავებს „აგვარებდნენ“. „ბრალდებულები პირადი სარგებლის მიღების მიზნით, საზღვარგარეთ მყოფ „კანონიერ ქურდებს“ უკავშირდებოდნენ და „ქურდულ გარჩევებს“ აწყობდნენ“, - წერს შსს. გამოძიების თანახმად, ბრალდებულები „ქურდული ტრადიციების“ შესაბამისად, „გადაწყვეტილებებს იღებდნენ და ერთ-ერთ მოდავე მხარეს მეორის, ასევე, თავიანთ სასარგებლოდ თანხის გადახდას აკისრებდნენ“. ...