აშშ-ის პრეზიდენტმა დონალდ ტრამპმა განაცხადა, რომ მომავალ კვირას უკრაინის პრეზიდენტ ვოლოდიმირ ზელენსკისთან შეხვედრას და რუსეთის პრეზიდენტ ვლადიმირ პუტინთან საუბარს გეგმავს. ამის შესახებ მან პარასკევს ვაშინგტონში, იაპონიის პრემიერ-მინისტრთან, სიგერუ ისიბასთან, შეხვედრის შემდეგ გამართულ პრესკონფერენციაზე განაცხადა. ტრამპს არ დაუზუსტებია, თუ რამდენად კონკრეტულია ამ შეხვედრის გეგმა. მან აღნიშნა, რომ არ ჩავა უკრაინაში შესახვედრად და შესაძლოა, ზელენსკის მომდევნო კვირაში შეხვდეს ვაშინგტონში. ამასთან, უკრაინის პრეზიდენტის ვაშინგტონში გამგზავრება ჯერ არ დაანონსებულა. Reuters-ის ინფორმაციით, უკრაინის პრეზიდენტმა ვოლოდიმირ ზელენსკიმ განაცხადა, რომ "ძალიან მნიშვნელოვანია", აშშ-ის პრეზიდენტთან შეხვედრა დონალდ ტრამპისა და ვლადიმირ პუტინის მოლაპარაკებამდე გაიმართოს. უკრაინაში ომის კომენტირებისას ტრამპმა განაცხადა, რომ "ადამიანური თვალსაზრისით" მას საშინლად მიიჩნევს. ტრამპი კვლავაც შეეხო ამ ომში მხარეების კატასტროფულ დანაკარგებს და აღნიშნა, რომ რუსეთმა 800 ან 900 ათასამდე ჯარისკაცი დაკარგა დაღუპულისა და დაჭრილის სახით. ხოლო უკრაინამ - 700 ათასამდე. კვირის დასაწყისში ვოლოდიმირ ზელენსკიმ განსხვავებული რიცხვები დაასახელა. რუსეთის წინააღმდეგ ომში დაიღუპა 45 100 და დაიჭრა დაახლოებით 390 000 უკრაინელი მებრძოლი, დაკარგულად მიჩნეულების და დატყვევებულების რიცხვი კი დაზუსტებული არ არის, - განაცხადა ზელენსკიმ ბრიტანელ ჟურნალისტთან, პირს მორგანთან ინტერვიუში, რომელიც 4 თებერვალს, ღამით YouTube-ზე გამოქვეყნდა. ასევე ნახეთ ზელენსკის მონაცემებით, რუსეთთან ომში დაღუპულია 45 100 უკრაინელი მებრძოლი ასევე ნახეთ ტრამპის შეთავაზება უკრაინას - ეგოიზმი თუ საქმიანი წინადადება? ასევე ნახეთ რუსი სამხედროები უკრაინელ ტყვეებს ხშირად ადგილზე ხვრეტენ - გაეროს საგანგაშო სტატისტიკა ...