ჩრდილოეთ კორეის ლიდერმა კიმ ჩენ ინმა განაცხადა, რომ კორეის სახალხო დემოკრატიული რესპუბლიკის არმია და ხალხი ყოველთვის დაუჭერენ მხარს რუსეთის ქმედებებს მისი სუვერენიტეტის, უსაფრთხოებისა და ტერიტორიული მთლიანობის დასაცავად. კიმ ჩენ ინი ასევე გამოეხმაურა აშშ-ს, იაპონიასა და სამხრეთ კორეას შორის სამმხრივ სამხედრო თანამშრომლობას და დაადანაშაულა ქვეყნები რეგიონში დაძაბულობის გამწვავებაში. მან ხაზი გაუსვა, რომ ფხენიანი არ ცდილობს ესკალაციას, მაგრამ მიიღებს აუცილებელ ზომებს „სამხედრო ბალანსის შესანარჩუნებლად“, - განაცხადა ჩრდილოეთ კორეის ლიდერმა შაბათს, თავდაცვის სამინისტროში ვიზიტის დროს. მანამდე იაპონური ტელეარხი NHK იტყობინებოდა, რომ 2025 წელს ჩრდილოეთ კორეა, რუსეთის დახმარებით, დრონების მასობრივ წარმოებას დაიწყებდა. არხის წყაროების თანახმად, ეს შეთანხმება შესაძლოა მიღწეულიყო უკრაინაში ჩრდილოეთ კორეის ჯარების გაგზავნის სანაცვლოდ რუსეთის მხარეს უკრაინის წინააღმდეგ საბრძოლველად. გასულ თვეში სამხრეთ კორეამ გამოთქვა ეჭვი, რომ ჩრდილოეთ კორეა ემზადებოდა რუსეთში უკრაინის წინააღმდეგ საბრძოლველად უფრო მეტი ჯარისკაცის (გარდა იმ 11 000-ისა, რომლებიც უკვე გაგზავნეს ბრძოლის ველზე) გასაგზავნად. ...