8-დან 9 თებერვლის ღამეს რუსეთის თავზე ჩამოგდებულია 36 დრონი - იუწყება რუსეთის თავდაცვის სამინისტრო. მათგან 18 უპილოტო საფრენი აპარატი გაანადგურეს კურსკის ოლქის თავზე, ოთხ-ოთხი - ორლოვსკის და კრასნოდარის მხარეების თავზე, სამ-სამი - ვორონეჟის და როსტოვის და თითო-თითო - ლენინგრადის, ბრიანსკის, ტულის ოლქებისა და რუსეთის მიერ ანექსირებული ყირიმის თავზე. დრონებით შეტევის საფრთხის გამო რეისებზე დროებითი შეზღუდვები ამოქმედდა ვოლგოგრადის, ნიჟნი-ნოვგოროდისა და სანქტ-პეტერბურგის აეროპორტებში. ვოლგოგრადის ოლქში ხელისუფლებამ 7 თებერვალს აკრძალა ინფორმაციის გამოქვეყნება უპილოტო საფრენი აპარატების შეტევებზე - ეს ეხება როგორც საკუთრივ ოლქს, ისე რუსეთის სხვა რეგიონებს. ადგილობრივ მედიას აღარ აქვს უფლება, გამოაქვეყნოს დრონების ჩამოგდების ამსახველი ფოტო და ვიდეომასალა ან თქვას, კონკრეტულად სად მოხდა ეს. რუსეთის რეგიონები - განსაკუთრებით უკრაინასთან მოსაზღვრე ადგილები - გასული წლის გაზაფხულიდან თითქმის ყოველდღიურადაა დრონებით თავდასხმების სამიზნე. არის მსხვერპლი და ნგრევა სამოქალაქო მოსახლეობაში. მოსკოვი იერიშებში უკრაინის ძალებს ადანაშაულებს. უკრაინის სარდლობა, როგორც წესი, არ აკეთებს კომენტარს ამგვარ თავდასხმებზე. ასევე ნახეთ კიევის განცხადებით, რუსეთის არმიამ უკრაინისკენ გაუშვა 150-ზე მეტი დრონი ...