საგარეჯოში 38 წლის გიორგი ფეიქრიშვილის განზრახ მკვლელობის ბრალდებით დაკავებულ 41 წლის გიორგი ქურდოვანიძეს საქართველოს პროკურატურამ ბრალდება წარუდგინა. „გამოძიებით დადგინდა, რომ 7 თებერვალს, საგარეჯოს მუნიციპალიტეტის ერთ-ერთ სოფელში, ბრალდებულმა შურისძიების მოტივით, ცეცხლსასროლი იარაღიდან გასროლით მოკლა ერთი პირი. სამართალდამცველებმა ბრალდებული 8 თებერვალს დააკავეს”, - ნათქვამია პროკურატურის განცხადებაში. ამ განცხადების თანახმად, საგამოძიებო უწყება ბრალდებულისთვის აღკვეთის ღონისძიების სახით პატიმრობის გამოყენების შუამდგომლობით სასამართლოს კანონით დადგენილ ვადაში მიმართავს. 7 თებერვალს გიორგი ფეიქრიშვილის ცხედარი საგარეჯოდან დაახლოებით ხუთ კილომეტრში მდებარე სოფელ ანთოკში, დაუსახლებელ ადგილზე იპოვეს. მოკლულის მამამ იოსებ ფეიქრიშვილმა ჟურნალისტებს უთხრა, რომ მკვლელობის მოტივი დიდი უთანხმოებაა, თუმცა რა, არ დააკონკრეტა. "მწყემსმა იპოვა ცხედარი. როგორც მეუბნებიან, შეიძლება მანქანაში მოკლეს და შემდეგ იქ გადააგდეს. ჩემი შვილი 7 თებერვალს 14:00 საათზე გავიდა სახლიდან. ალბათ მალევე შეხვდა იმ პირს, რომელმაც შემდეგ მოკლა. ჩვენ 16:00 საათზე გაგვაგებინეს ამბავი. ტყვიით არის მკვდარი, გულში აქვს მოხვედრილი. სხვა არაფერი არ ვიცით", - ამბობს იოსებ ფეიქრიშვილი. მკვლელობის ბრალდებით დაკავებული გიორგი ქურდოვანიძე საგარეჯოს მერიის ეკონომიკური განვითარების და ქონების მართვის სამსახურის თანამშრომელია. დაკავებულის ოჯახის წევრები მედიასთან კომენტარს არ აკეთებენ. ფაქტზე გამოძიება საქართველოს სისხლის სამართლის კოდექსის 108-ე, განზრახ მკვლელობის და 236-ე მუხლის მე-3 ნაწილით (საბრძოლო მასალის მართლსაწინააღმდეგო შეძენა, შენახვა) მიმდინარეობს. დანაშაული 10-დან 15 წლამდე ვადით თავისუფლების აღკვეთას ითვალისწინებს. ასევე ნახეთ კახეთში 38 წლის კაცი მოკლეს, პოლიციამ ბრალდებული ცხელ კვალზე დააკავა ...