გერმანიის კანცლერმა ოლაფ შოლცმა კვლავ გამორიცხა შორი მოქმედების რაკეტა Taurus-ების უკრაინისთვის მიწოდების შესაძლებლობა - პოლიტიკოსის თქმით, რაკეტებს შეუძლია გამოიწვიოს ნგრევა რუსეთის სიღრმეში. პოლიტიკური დებატების დროს, შოლცმა გააკრიტიკა არჩევნებში თავისი მთავარი პოლიტიკური კონკურენტი ფრიდრიხ მერცი, გერმანიის კანცლერობის კანდიდატი ოპოზიციური ქრისტიან-დემოკრატიული კავშირისა და ქრისტიან-სოციალური კავშირის ბლოკიდან. "მე არ ვფიქრობ, რომ სწორი იყოს ისეთი იარაღის მიწოდება, რაც ნგრევას გამოიწვევს რუსეთის სიღრმეში. მჯერა, რომ ეს არის ზუსტად ის ნაბიჯი, რომელიც არ უნდა გადაიდგას, თუ თქვენ პასუხისმგებელი ხართ გერმანიაზე", - განაცხადა 9 თებერვალს 90-წუთიანი სატელევიზიო დებატების დროს ოლაფ შოლცმა. შოლცისგან განსხვავებით, მერცი არ გამორიცხავს უკრაინის არმიისთვის „ტაურუსის“ ტიპის შორი მოქმედების რაკეტების მიწოდებას, რასაც კიევი დიდი ხანია ითხოვს, რათა დაიცვას თავისი ინფრასტრუქტურა რუსეთის თავდასხმისგან. ოქტომბერში მერცმა გერმანულ მედიას განუცხადა, რომ გარკვეული პირობებით მხარს დაუჭერს დაახლოებით 500 კილომეტრის მანძილზე მოქმედი რაკეტების კიევისთვის მიწოდებას. თუ რუსული დარტყმები უკრაინაზე "არ შეჩერდება, მაშინ პირველი ნაბიჯი იქნება [უკრაინიდან გაშვებული რაკეტების] სროლის დიაპაზონზე დაწესებული შეზღუდვების მოხსნა, მეორე ნაბიჯი კი Taurus-ების მიწოდება", - განაცხადა ფრიდრიხ მერცმა. ასევე ნახეთ გერმანიის კანცლერობის კონსერვატორი კანდიდატი კიევში ჩავიდა გერმანიაში ვადამდელი საპარლამენტო არჩევნები 23 თებერვალს გაიმართება. ბუნდესტაგის არჩევნების შემდეგ უნდა ჩამოყალიბდეს ახალი მმართველი კოალიცია, ასევე მინისტრთა კაბინეტი და აირჩიონ ახალი კანცლერი. დამკვირვებლების აზრით, დიდი ალბათობით, ეს შეიძლება იყოს SPD-სა და CDU/CSU-ს კოალიცია, ხოლო კანცლერი გახდება გერმანიის ქრისტიან-დემოკრატიული კავშირის (CDU) ლიდერი ფრიდრიხ მერცი. ...