აქტივისტი, ფეისბუკჯგუფ "დაიტოვეს" დამფუძნებელი ნენსი ვოლანდი (ქრისტინე ბოტკოველი) მოსამართლე ზვიადი ცეკვავამ 5 ათასი ლარით დააჯარიმა. მას ადმინისტრაციულ სამართალდარღვევათა კოდექსის 174 პრიმა მუხლის მე-4 ნაწილის დარღვევას ედავებოდნენ, კერძოდ, 26 იანვარს საპროტესტო აქციაზე გზის გადაკეტვას. გადაწყვეტილებას ნენსი ვოლანდმა "უსამართლო" უწოდა. მისი თქმით, შინაგან საქმეთა სამინისტრომ სასამართლო სხდომაზე წარმოადგინა ვიდეოები, რომლებზეც ჩანს, როგორ დგას ის რუსთაველზე, თუმცა ამ დროისთვის რუსთაველი უკვე გადაკეტილი იყო. "26 იანვარს ჩემს მეგობრებთან ერთად ვიდექი ტროტუარზე. დაახლოებით 20:20 საათზე რუსთაველზე მოვიდნენ მარშის მონაწილეები და გზა გადაიკეტა. ჩემი კადრი გადაღებულია 21:06 წუთზე, როცა ვიდექი გადაკეტილ რუსთაველზე. სასამართლო ამტკიცებს, რომ უკვე გადაკეტილი გზა კიდევ ერთხელ გადავკეტე", - თქვა ნენსი ვოლანდმა. მისი სიტყვებით, არცერთ სამართალდამცველს არ გაუფრთხილებია შესაძლო სამართალდარღვევის შესახებ. "ჩემით არ შემეძლო შემეფასებინა, რამდენი ადამიანია საკმარისი გზის გადასაკეტად". ნენსი ვოლანდი გადაწყვეტილებას გაასაჩივრებს მას შემდეგ, რაც შესაბამისი დოკუმენტები ჩაბარდება. პროევროპულ საპროტესტო აქციებზე ადმინისტრაციული წესით დაკავებული და ნაცემი დემონსტრანტების საქმეებს ყველაზე ხშირად ექვსი მოსამართლე განიხილავს: კობა ჩაგუნავა, ლელა მილდენბერგერი, ლელა ცაგარეიშვილი, ზვიადი ცეკვავა, ნინო ენუქიძე და მანუჩარ ცაცუა. ექვსივე მოსამართლეს 16 დეკემბერს ესტონეთმა სანქციები დაუწესა. 75-ე დღეა, საქართველოში უწყვეტად იმართება პროევროპული აქციები ახალი არჩევნების ჩატარებისა და აქციებზე დაკავებული ადამიანების გათავისუფლების მოთხოვნით. მოქალაქეები ასევე აპროტესტებენ 2024 წლის 28 ნოემბერს „ქართულ ოცნებაში“ მიღებულ გადაწყვეტილებას, რომლის მიხედვითაც, მომდევნო ოთხი წლის განმავლობაში დღის წესრიგში აღარ დააყენებენ ევროკავშირთან გაწევრიანებისთვის მოლაპარაკების გახსნის საკითხს. ბოლო ორი თვის განმავლობაში პოლიციამ იძალადა აქციის არაერთ მონაწილეზე, მათ შორის ჟურნალისტებზე, რომლებიც პროცესებს აშუქებდნენ. ამ დრომდე არცერთი მათგანი დაკავებული არ არის. გზის გადაკეტვისთვის კი ჯარიმები 2024 წლის 30 დეკემბრიდან გაიზარდა. ამ ქმედებაში მონაწილეობისთვის ადმინისტრაციული სახდელი 500 ლარის ნაცვლად 5000 ლარი გახდა, ხოლო ორგანიზებისთვის - 5 000-ის ნაცვლად 15 000 ლარი. ასევე ნახეთ ნენსი ვოლანდი: ჩხრეკისას სახლში შემოვიდა ორი ქალი პოლიციელი და მითხრეს, რომ ტანსაცმელი სრულიად გამეხადა ...