10 თებერვალს, დოკუმენტის ხელმოწერის შემდეგ ტრამპმა განაცხადა, რომ აშშ-ს ფოლადის და ალუმინის ადგილზე წარმოება სჭირდება, ქვეყანაში მრეწველობის დაბრუნების დროა და ეს ერთ-ერთი პირველი ნაბიჯია. ახალი საბაჟო ტარიფი ვრცელდება ყველა ქვეყანაზე, საიდანაც ამ პროდუქციის იმპორტირება ხდება. შეერთებული შტატებისთვის ფოლადის და ალუმინის უმსხვილესი მიმწოდებლები არიან მეზობელი კანადა და მექსიკა. ასევე, სამხრეთი კორეა. კანადის ონტარიოს პროვინციის გუბერნატორმა დაგ ფორდმა დონალდ ტრამპი დაადანაშაულა ქაოსში, რომელიც საფრთხეს უქმნის ეკონომიკას. ონტარიოს პროვინცია კანადაში ფოლადის წარმოების ძირითადი ადგილია. საბაჟო გადასახადის დაწესების შესახებ აშშ-ის პრეზიდენტის გადაწყვეტილებამ ფოლადისა და ავტომობილების მწარმოებელი სამხრეთკორეული კომპანიების აქციების კურსის ვარდნა გამოიწვია. ასევე ნახეთ აშშ 30 დღით აჩერებს კანადისა და მექსიკისთვის ახალი საბაჟო ტარიფების ამოქმედებას პრეზიდენტობის პირველი ვადის დროს, რომელიც 2017 წლის 20 იანვრიდან დაიწყო, დონალდ ტრამპმა 25%-იანი საბაჟო გადასახადი დაუწესა კანადიდან, მექსიკიდან და ევროკავშირის სახელმწიფოებიდან იმპორტირებულ ფოლადს და 10%-იანი - კანადურ ალუმინს. ერთი წლის შემდეგ შეერთებულმა შტატებმა კანადასა და მექსიკასთან მიაღწია შეთანხმებას ტარიფების გაუქმების შესახებ, ევროკავშირისთვის კი საიმპორტო გადასახადი 2021 წლამდე მოქმედებდა. სააგენტო Reuters-ს მოჰყავს კანადის ალუმინის მწარმოებელთა ასოციაციის პრეზიდენტის, ჟან სიმარის განცხადება, რომ დონალდ ტრამპის ახალი გადაწყვეტილება დამანგრეველი იქნება თავად აშშ-ის ეკონომიკისთვის, რაც წლების წინ, ტარიფების პირველად შემოღების დროს უკვე ნახეს. ალუმინის დისტრიბუტორი ამერიკული კომპანია PerenniAL-ის დირექტორის, ბრაიან ჰესეს შეფასებით, დღევანდელი ადგილობრივი წარმოება მოთხოვნის ნახევარსაც ვერ დააკმაყოფილებს. ჰესეს განცხადებით, ალუმინის ადგილზე წარმოების გაზრდას მასზე მეტად არავინ ემხრობა, მაგრამ ეს გონივრულად, რამდენიმე წლის განმავლობაში უნდა კეთდებოდეს. ...