ჩრდილოეთ კორეის საავადმყოფოებში ასობით რუს ჯარისკაცს მკურნალობენ - ამბობს რუსი დიპლომატი, რითაც კიდევ ერთი კუთხით ხდის ცხადს იმ თანამშრომლობის მასშტაბს, რომელიც მოსკოვსა და ფხენიანს შორისაა უკრაინის ომთან მიმართებით. სახელმწიფო გამოცემა "რასიისკაია გაზეტასთან" ინტერვიუში, ჩრდილოეთ კორეაში რუსეთის ელჩმა ალექსანდრ მატსეგორამ დეტალები არ გაამხილა ჩრდილოეთ კორეაში ჰოსპიტალიზებული რუსი სამხედროების რაოდენობაზე ან დაჭრილთა და დაღუპულთა რიცხვზე. "[მოსკოვსა და ფხენიანს შორის] ძმური დამოკიდებულების ნათელი მაგალითია [უკრაინის ომში] დაჭრილი ასობით სამხედროს რეაბილიტაცია კორეის სანატორიუმებსა და საავადმყოფოებში", - ამბობს ელჩი. მოსკოვმა ჩრდილოეთ კორეას დახმარებისთვის მიმართა დაახლოებით ექვს თვეში მას მერე, რაც 2022 წლის თებერვალში სრული მასშტაბით შეიჭრა უკრაინაში. დასავლეთის დაზვერვის განცხადებით, რუსეთი ფხენიანისგან ყიდულობდა მილიონობით საარტილერიო ჭურვს. ვრცელდებოდა სატელიტით გადაღებული სურათები, რომლებიც ასახავდა სარკინიგზო ხიდების და საპორტო ობიექტების რეკონსტრუქციას საზღვარზე, წყნარი ოკეანის სანაპიროზე. გასული წლის შემოდგომაზე ჩრდილოეთ კორეის სამხედროები გამოჩნდნენ ფრონტის ხაზზე, უწინარესად რუსეთის კურსკის რეგიონში, სადაც უკრაინის ძალები აგვისტოში შევიდნენ. ნოემბერში რუსეთის პრეზიდენტმა ვლადიმირ პუტინმა და ჩრდილოეთ კორეის ლიდერმა კიმ ჩენ ინმა ხელი მოაწერეს სტრატეგიული თანამშრომლობის ხელშეკრულებას, რითაც კიდევ უფრო გააღრმავეს თავიანთ ქვეყნებს შორის ეკონომიკური და პოლიტიკური კავშირები. ასევე ნახეთ კიმ ჩენ ინი რუსეთს უცვლელ მხარდაჭერას ჰპირდება ...