საქართველოს ენერგეტიკისა და წყალმომარაგების კომისია აცხადებს, რომ 150 ათასი აბონენტიდან 70%-ს გაზის მიწოდება უკვე აღუდგა, დარჩენილ 30% კი, რომელიც დაახლოებით 45 ათასი აბონენტია, დღის ბოლომდე მიეწოდება გაზი. სემეკში 17 თებერვალს გაიმართება სხდომა, რომელზეც განიხილავენ აბონენტების შენიშვნებს გაზის მიწოდების აღდგენასა და მასთან დაკავშირებულ საკითხებთან დაკავშირებით. 9 თებერვალს, საღამოს, 500-მილიმეტრიანი მილსადენი, რომელიც თბილისში, ვაკე-საბურთალოს რაიონს ამარაგებს, დაზიანდა. როგორც კომპანია „თბილისი ენერჯი“ აცხადებდა, მიზეზი, სავარაუდოდ, „მესამე პირის“ მიერ გამოწვეული დაზიანება იყო. რადიო თავისუფლებამ ვერ გაარკვია კომპანიაში, ვინ იგულისხმებოდა „მესამე პირში“. 10 თებერვალს, დილით, კომპანიამ გაავრცელა განცხადება, რომლითაც გაირკვა, რომ მილსადენის დაზიანებული ნაწილი აღადგინეს და ქსელში გაზი გაუშვეს. „თბილისი ენერჯის“ ცნობით, ვაკეში გაზის მიწოდება სრულად აღდგება დღეს, 15:00 საათამდე, საბურთალოზე კი - 22:00 საათამდე. ...