7 ბალისტიკური რაკეტით „ისკანდერი“ შეტევა იყო კიევსა და კრივოი-როგზე. სარდლობის ცნობითვე, საჰაერო თავდაცვის სისტემამ 6 რაკეტა ჩამოაგდო. უკრაინის საგანგებო სიტუაციების სამსახურის ინფორმაციით, კიევში 1 ადამიანი დაიღუპა და 4 დაშავდა. საჰაერო თავდაცვის ძალების მიერ მოგერიებული რაკეტების ნამსხვრევებმა სახლები და სხვა შენობები დააზიანა და ხანძრები გამოიწვია კიევის ოთხ რაიონში. ადგილობრივი ხელისუფლების ცნობით, ქალაქ კრივოი-როგში დაზიანებულია 3 მრავალბინიანი სახლი და სასწავლო დაწესებულების, სასტუმროს და ერთ-ერთი ადმინისტრაციული სამსახურის შენობები. მსხვერპლი არ არის. განახლება: 12 თებერვალს, შუადღის შემდეგ რუსეთის თავდაცვის სამინისტრომ გამოაცხადა, რომ დილით, „ჯგუფური სარაკეტო დარტყმა" იყო უკრაინის სამხედრო-სამრეწველო კომპლექსის საამქროებზე, სადაც უპილოტო საფრენ აპარატებს აწარმოებენ და „დარტყმის მიზნები მიღწეულია". რუსეთი ტრადიციულად არაფერს ამბობს სამოქალაქო მოსახლეობაში მსხვერპლისა და სამოქალაქო ობიექტების განადგურების შესახებ. ასევე ნახეთ ტრამპი ზელენსკისთან მოსალაპარაკებლად კიევში ფინანსთა მინისტრს აგზავნის უკრაინის საჰაერო ძალების სარდლობის ინფორმაციით, გასული ღამის განმავლობაში რუსეთის საოკუპაციო ძალებმა უკრაინას შეუტიეს 123 უპილოტო საფრენი აპარატითაც. სარდლობის თანახმად, ხარკოვის, პოლტავის, სუმის, ჩერკასის, ჩერნიგოვის, კიროვოგრადის, ჟიტომირის, დნეპროპეტროვსკის, ხერსონის, ნიკოლაევისა და კიევის ოლქებში 71 დრონი ჩამოაგდეს, 40 კი ლოკალურად დაიკარგა ნეგატიური შედეგების გარეშე. კიევის ოლქის სამხედრო ადმინისტრაციის ინფორმაციით, უკრაინის საჰაერო თავდაცვის ძალების მიერ მოგერიებული დრონების ნამსხვრევებმა ბორისპოლის რაიონში 9 კერძო სახლი დააზიანა, ობუხოვის რაიონში კი ხანძარი გაჩნდა რამდენიმე არასაცხოვრებელ შენობაში. ჩერნიგოვის საოლქო-სამხედრო ადმინისტრაციის ხელმძღვანელ ვიაჩესლავ ჩაუსის ცნობით, 2 ადამიანი დაშავდა კრიტიკული ინფრასტრუქტურის ობიექტზე დრონით დარტყმის შედეგად. ჩაუსი კონკრეტულ ობიექტს არ ასახელებს. სუმის ოლქის ხელისუფლება იუწყება, რომ ხანძარი გაჩნდა რამდენიმე სახლში და დაზიანებულია ფერმერული მეურნეობაც. ...