პირველი ცნობები, რომ ლიპეცკზე უპილოტო საფრენი აპარატებით შეტევაა, 13 თებერვალს, გამთენიისას გაავრცელეს სოციალური ქსელების ადგილობრივმა მომხმარებლებმა. მოგვიანებით, ლიპეცკის ოლქის გუბერნატორ იგორ არტამონოვის ტელეგრამ-არხზე გამოქვეყნდა ცნობა უკრაინული დრონებით „მასირებული შეტევის“ შესახებ. გუბერნატორის თანახმად, რუსეთის საჰაერო თავდაცვის ძალების მიერ მოგერიებული დრონების ნამსხვრევები ჩამოცვივდა ქალაქ ლიპეცკის აერაციის სადგურის ტერიტორიაზე, სადაც ერთი თანამშრომელი დაიჭრა. რუსული წყაროების ცნობით, ეს სადგური მდებარეობს ლიპეცკის სამრეწველო ზონაში, სადაც მეტალურგიული კომბინატიცაა. არტამონოვის თანახმად, დრონების ნამსხვრევებმა დააზიანა ორი კერძო სახლიც. ქალაქის რამდენიმე რაიონს ელექტროენერგიის მიწოდება შეუწყდა. ლიპეცკი, რომელსაც „განსაკუთრებული ეკონომიკური ზონის" სტატუსი აქვს, მეტალურგიული მრეწველობის და საავიაციო ცენტრად ითვლება. ქალაქის ცენტრიდან რვა კილომეტრში მდებარეობს რუსეთის საჰაერო-კოსმოსური ძალების აეროდრომი. 2024 წლის აგვისტოში უკრაინის შეიარაღებულმა ძალებმა ლიპეცკზე, მათ შორის სამხედრო აეროდრომზე, უპილოტო საფრენი აპარატებით მასირებული შეტევა მიიტანეს. ასევე ნახეთ რუსეთის ლიპეცკის ოლქში აფეთქებები იყო, დაწყებულია ევაკუაცია რუსეთის თავდაცვის სამინისტროს მიერ დილით გამოქვეყნებული მონაცემებით, გასული ღამის განმავლობაში საჰაერო თავდაცვის საშუალებებით „გზად დაიჭირეს და გაანადგურეს“ 83 უკრაინული დრონი, მათ შორის 37 ბრიანსკის ოლქში, 12-12 - ლიპეცკსა და კურსკში, 9 - ტვერის ოლქში, 3-3 - ბელგოროდის, კალუგის, სმოლენსკისა და ვორონეჟის ოლქებში და 1 - როსტოვში. დამოუკიდებელი წყაროებით ეს მონაცემები დადასტურებული არ არის. რუსეთთან ომში მყოფ უკრაინას რუსეთის ტერიტორიაზე და ანექსირებულ ყირიმში კანონიერ სამიზნედ აქვს გამოცხადებული სამხედრო ობიექტები და საწარმოები, რომლებიც რუსული არმიის მომარაგებაზე მუშაობენ. ასევე ნახეთ უკრაინის გენშტაბმა დაადასტურა დრონებით დარტყმა სარატოვის ნავთობგადამამუშავებელ ქარხანაზე ...