ნარკოდანაშაულის ბრალდებით დაკავებული კიდევ სამი დემონსტრანტიდან ორის საქმის პროკურორიც ისაა. სამივეს - ნიკოლოზ კაციას, თედო აბრამოვსა და ანტონ ჩეჩინს ერთნაირი ბრალი აქვთ - დიდი ოდენობით ნარკოტიკული საშუალების შეძენა-შენახვა. ადვოკატები ამტკიცებენ, რომ დაკავებულებს აკრძალული ნივთიერებები პოლიციამ „ჩაუდო“. და ამ მოსაზრების დასტურად რამდენიმე საეჭვო გარემოება მოჰყავთ: სამივე შემთხვევაში პოლიციას ინფორმაცია ანონიმურმა წყარომ მიაწოდა; სამივეს ნარკოტიკი ქურთუკის გარე ჯიბეში უპოვეს; არცერთ შემთხვევაში პოლიციელებმა ჩხრეკის პროცესი არ გადაიღეს; საქმეში ნეიტრალური მტკიცებულება არ არსებობს: ეს შეიძლება ყოფილიყო პოლიციელის მიერ გადაღებული ვიდეო ან რომელიმე ნეიტრალური მოქალაქის ჩვენება, რომელიც ნარკოტიკის „ამოღებას“ დაადასტურებდა. ნარკოდანაშაულის საქმეებზე, საკონსტიტუციო სასამართლომ 2020 წლის 25 დეკემბერს მიღებული გადაწყვეტილებით, საქმეზე „გიორგი ქებურია საქართველოს პარლამენტის წინააღმდეგ“, საგამოძიებო უწყებებს ნეიტრალური მტკიცებულების მოპოვება დაავალდებულა. სასამართლოს აზრით, როდესაც პოლიციელს შეუძლია მოიპოვოს ჩხრეკის სანდოობის გამამყარებელი მტკიცებულება და ის ამას არ აკეთებს, ნდობის ხარისხი მნიშვნელოვნად იკლებს. თუ პოლიციელი ნეიტრალურ მტკიცებულებას ვერ მოიპოვებს, ის ვალდებულია დაასაბუთოს, რომ „ამისთვის ყველაფერი გააკეთა“. თანამედროვე ტექნოლოგიები კი იოლად იძლევა იმის შესაძლებლობას, რომ ჩხრეკის პროცესი ვიდეოზე აღიბეჭდოს. იდენტური გარემოებებია ექიმ გიორგი ახობაძის საქმეშიც, ერთი განსხვავებით, მის წინააღმდეგ პროკურორი - შმაგი გობეჯიშვილია. არცერთი დაკავებული ბრალს არ აღიარებს. ასევე ნახეთ 20 წელი ან უვადო - რა ვიცით ნარკოდანაშაულისთვის დაკავებულ დემონსტრანტებზე პროკურორ ნუგზარ ჭიტაძეს რადიო თავისუფლება დაცვის მხარის არგუმენტებსა და ეჭვებზე ესაუბრა. პროკურორი სახელმწიფო ბრალმდებელია და თავის უფლებამოსილებას სახელმწიფოს სახელით ახორციელებს. მას ეკისრება ბრალდების მტკიცების ტვირთი. რადიო თავისუფლება: ბატონო ნუგზარ, თქვენ ნარკოდანაშაულისთვის დაკავებული სამი დემონსტრანტის საქმეების პროკურორი ხართ. როგორ ხსნით იმას, რომ ეს საქმეები გაჭრილი ვაშლივით ჰგავს ერთმანეთს? ნუგზარ ჭიტაძე: ყველა ნარკოტიკული დანაშაული ჰგავს ერთმანეთს. თქვენ კონკრეტულად რას გულისხმობთ მსგავსებაში? ნუგზარ ჭიტაძე, პროკურორი რადიო თავისუფლება: რადგან ამბობთ, რომ ზოგადად ყველა ასეთი საქმე ერთმანეთს ჰგავს, ანუ უნდა ვივარაუდოთ, რომ ამ საქმეების მსგავსად არცერთ სხვა საქმეში არ არსებობს, მაგალითად, ვიდეოჩანაწერი, როგორც ნეიტრალური მტკიცებულება? ნუგზარ ჭიტაძე: არის საქმე, სადაც გვაქვს ჩანაწერი, არის საქმეები, სადაც არ გვაქვს… მე 30-ზე მეტი საქმე მაქვს, მაგრამ თქვენ მხოლოდ სამ...