აშშ-ის ვიცე-პრეზიდენტმა ჯეი დი ვენსმა Wall Street Journal-თან ინტერვიუში განაცხადა, რომ უკრაინაში ომის შესაწყვეტად მოლაპარაკებისას ყველა ბერკეტი მაგიდაზეა, მათ შორის „სამხედრო ბერკეტები“. მიუნხენის საერთაშორისო კონფერენციაზე გამოსვლამდე გამოქვეყნებულ ინტერვიუში, ვენსი ამბობს, რომ „პრეზიდენტი არ აპირებს ამაზე დახუჭული თვალებით წავიდეს“ - ის იტყვის, „ყველაფერი მაგიდაზეა, მოდით შევთანხმდეთ“. „არის ზემოქმედების ეკონომიკური იარაღი, არის, ცხადია, სამხედრო ინსტრუმენტებიც“, - განაცხადა აშშ-ის ვიცე-პრეზიდენტმა. ვენსის თქმით, ადრეა იმაზე ლაპარაკი, უკრაინის რომელი ტერიტორიები დარჩება რუსეთს და უსაფრთხოების რა გარანტიებს შესთავაზებენ კიევს აშშ და სხვა მოკავშირეები. ამერიკულ გაზეთში გამოქვეყნებულ ინტერვიუში ვენსი ამბობს, რომ „არსებობს ფორმულირებების, კონფიგურაციების ურიცხვი რაოდენობა, მაგრამ ჩვენ იმისთვის ვზრუნავთ, რომ უკრაინას ჰქონდეს სუვერენული დამოუკიდებლობა“. მან ასევე თქვა, რომ ევროპის ქვეყნები, რა თქმა უნდა, იყვნენ უკრაინის შესახებ მოლაპარაკების მონაწილეები. ვენსის ეს კომენტარები გამოქვეყნდა უკრაინის პრეზიდენტ ვოლოდიმირ ზელენსკისთან შეხვედრის წინ, რომელიც მიუნხენში გაიმართება. შეხვედრა შედგება აშშ-ის პრეზიდენტ დონალდ ტრამპის რუსეთის და უკრაინის პრეზიდენტთან, პუტინსა და ზელენსკისთან, ცალ-ცალკე გამართული სატელეფონო საუბრის შემდეგ. ასევე ნახეთ ჯეი დი ვენსი: ევროპის პრობლემა მისსავე შიგნითაა ...