მიუნხენის უსაფრთხოების 61-ე კონფერენციის ხელმძღვანელი ქრისტოფ ჰოისგენი მოელის, რომ აშშ-ის ვიცე-პრეზიდენტი ჯეი დი ვენსი შეხვედრაზე გამოსვლისას აშშ-ის ჯარის ევროპიდან გაყვანის შესახებ გამოაცხადებს. კონფერენციამ მუშაობა დღეს, 14 თებერვალს, დაიწყო. დღესვეა დაგეგმილი ვენსის გამოსვლა. კონფერენციის მთავარი თემა უკრაინაში ომის გარშემო მოლაპარაკებაა. ჰოისგენმა განაცხადა, რომ რუსეთის წარმომადგენლები კონფერენციაზე მიწვეული არ არიან. გერმანიის რადიოსთან საუბარში მან თქვა, რომ რუსეთის წარმომადგენლებთან მოლაპარაკების შესახებ მხოლოდ დონალდ ტრამპის ნათქვამიდან იცის. აშშ-ის პრეზიდენტმა წინა დღეს უთხრა ჟურნალისტებს, რომ მიუნხენში პირველ მოლაპარაკებას გამართავენ აშშ-ის, უკრაინისა და რუსეთის წარმომადგენლები. უკრაინის პრეზიდენტის მრჩეველმა ლიტვინმა კიევში განაცხადა, რომ რუსეთის მხარესთან მიუნხენში მოლაპარაკება დაგეგმილი არ არის. რუსეთმა განაცხადა, რომ მიუნხენში ოფიციალური წარმომადგენლები არ ჰყავს, რადგან მოწვევა არ აქვს. მიუნხენის კონფერენციის მუშაობაში მონაწილეობას იღებს უკრაინის პრეზიდენტი ვოლოდიმირ ზელენსკი, ასევე - გერმანიის კანცლერი ოლაფ შოლცი. გერმანიას და სხვა ქვეყნებს სურთ, რომ უკრაინის სამშვიდობო მოლაპარაკებაში ევროკავშირიც მონაწილეობდეს - სხვა ქვეყნების მეთაურები. მიუნხენში ელიან ასევე აშშ-ის სახელმწიფო მდივანს, მარკო რუბიოს, რომლის მიუნხენში მიმავალი თვითმფრინავი ტექნიკური გაუმართაობის გამო უკან, ვაშინგტონში დაბრუნდა. არ არის ცნობილი, მოახერხებს თუ არა ის 14 თებერვალს ზელენსკისა და ვენსთან შეხვედრას. ასევე ნახეთ მიუნხენის უსაფრთხოების კონფერენცია - რა დევს სასწორზე? ...