ტენდერი გამოცხადდა 2024 წლის 12 დეკემბერს, როცა დედაქალაქში მრავალრიცხოვანი პროევროპული აქციები იმართებოდა, შინაგან საქმეთა სამინისტრო კი დემონსტრანტებს ვიდეოჩანაწერებზე დაყრდნობით აკავებდა სისხლის სამართლის წესით. 121 ვიდეოკამერაში, 114 კავშირის წერტილსა და კვების წყაროში და 96 ცალ პროგრამულ ლიცენზიაში მერიის სააგენტო 2 972 620 ლარს იხდის. ხელშეკრულების მიხედვით, თბილისის მერიას 14 სამუშაო დღეში, ანუ 7 თებერვლამდე უნდა მიეწოდებინა ინფორმაცია იმ მისამართების შესახებ, სადაც ახალი სათვალთვალო კამერები უნდა დაეყენებინათ. კომპანიას ამ დავალების შესასრულებლად 90-დღიანი ვადა აქვს. „გამომდინარე იქიდან, რომ იმ გზებზე, სადაც დღეის მდგომარეობით არ არის დამონტაჟებული ვიდეო-სამეთვალყურეო კამერები, ხშირია სამართალდარღვევები და ვერ ხორციელდება სათანადო რეაგირება, დამატებით საჭირო გახდა 121 ერთეული ვიდეო-სამეთვალყურეო კამერის შესყიდვა“, - უთხრეს რადიო თავისუფლებას თბილისის მერიაში. „დელტა კონსალტინგი“ აწვდის კამერებს სხვა სახელმწიფო უწყებებსაც და ქსელიც გაჰყავს. რამდენიმე დღის წინ მოხსნეს პარლამენტის შენობაზე განთავსებული სათვალთვალო კამერები, რომლებიც რუსთაველის გამზირს უყურებდა. პარლამენტის ფასადზე მხოლოდ რამდენიმე კამერაა დარჩენილი. ამ გამზირზე დღეს ტექნიკური ჯგუფები მუშაობენ. რადიო თავისუფლებამ თბილისის მერიის პრესსამსახურში დამატებით იკითხა, ტარდება თუ არა აღნიშნული სამუშაოები მათი დაკვეთით. ამ საკითხზე კომენტარის მიღების შემთხვევაში მასალა განახლდება. პარლამენტის შენობის მიმდებარე ტერიტორიაზე სამეთვალყურეო კამერებს აყენებენ. რუსთაველის გამზირზე დაზიანებული კამერების შეცვლის მოტივით, შინაგან საქმეთა სამინისტროს დაქვემდებარებულმა 112-მა 30 კამერა იყიდა სახისა და ემოციების ამოცნობის ფუნქციით. მასში 85 ათასი ლარი დაიხარჯა. ...