საქართველოს მეხუთე პრეზიდენტის, სალომე ზურაბიშვილი განცხადებით, დასავლეთის რეაქცია ბოლო დროს, საქართველოში განვითარებული პროცესების მიმართ "არასაკმარისია". ამის შესახებ მან მიუნხენის უსაფრთხოების კონფერენციის პანელურ დისკუსიაზე, "საქართველო ყურადღების ცენტრში" განაცხადა. "ჩვენ გვყავს მარიონეტული მთავრობა, ისევ ხელში ჩაიგდო ძალაუფლება. იგი იღებს ისეთ გადაწყვეტილებებს, განსაკუთრებით, კანდიდატის სტატუსის მიღების შემდეგ, რომ დააშოროს საქართველო ევროპულ გზას და დააბრუნოს იგი რუსულ ორბიტაზე. ეს ძალიან საშიშია, რადგან თუკი ეს მოხდება საქართველოში, - და მე ვერ ვხედავ საკმარის რეაქციას ჩვენი ევროპელი და ამერიკელი პარტნიორების მხრიდან ამ დრომდე, - ეს შეიძლება სადმე სხვაგანაც გამოიცადოს. საქართველო არ არის მხოლოდ საქართველო, მხოლოდ ის ქვეყანა არ არის, სადაც მოსახლეობის 80% მხარს უჭერდა ევროპულ გზას, ეს შავი ზღვის საკითხიცაა - ხვალ ვინ გააკონტროლებს შავ ზღვას?", - აღნიშნა ზურაბიშვილმა. დისკუსიაზე, მანვე ისაუბრა ანაკლიის ღრმაწყლოვანი პორტის პროექტზე, ნატოსა და ევროკავშირის შეწყვეტილ პროექტებზე საქართველოში და განაცხადა, რომ ის რაც საქართველოში ხდება, დასავლეთისთვის "მეტია, ვიდრე ქართული პოლიტიკა". "ბოლო პერიოდამდე, უკრაინის ომამდე, ჩვენს პორტებში ნატოს ხომალდები შემოდიოდა. ეს შეწყდა. რუსეთმა განაცხადა, რომ ახალ სამხედრო ბაზას გახსნის საქართველოს ოკუპირებულ ტერიტორიებზე. ანაკლიის პორტი ერთ-ერთი დიდი პროექტია, არავინ იცის, როდის აიღებენ კონტროლს ჩინელები, ესაა რაც ჩვენ გვესმის, მაგრამ, როგორც ყოველთვის ხდება ხოლმე ჩინეთთან მიმართებით, ვერ ვხედავთ ხელშეკრულებას, არ ვიცით მისი შინაარსი და ვიგებთ მაშინ, როცა ყველაფერი დასრულებულია. ეს რეგიონი იყო ძალიან მნიშვნელოვანი ევროკავშირისთვის სამომავლო პროექტებისთვის, მათ შორის, კავშირგაბმულობის, ენერგეტიკის სფეროებში, იმისათვის რომ გზა გაჭრილიყო ცენტრალური აზიისკენ... ვფიქრობ, ეს უფრო მეტია, ვიდრე ქართული პოლიტიკა, ვიდრე ერთი პარტიის გამარჯვება ოპოზიციაზე, ეს არის გამოწვევა ევროკავშირისთვის", - განაცხადა სალომე ზურაბიშვილმა. სალომე ზურაბიშვილს დისკუსიაზე ჰკითხეს საქართველოში მიმდინარე საპროტესტო ტალღაზე, "ქართული ოცნების" საპასუხო ქმედებებსა და ამ ფონზე, რა სტრატეგია არსებობს ქვეყნის შიგნით? ზურაბიშვილის სიტყვებით, საქართველოში მოსახლეობა მშვიდობიანად, თვითორგანიზებით გადის ქუჩის აქციებზე და სტრატეგიაა "წინააღმდეგობა", ასევე არსებული პოლიტიკური პარტიების კონსოლიდაცია და ახალი პოლიტიკური ძალების შექმნა. "ეს არაა რევოლუცია და ჩვენ გვყავს ძალიან შეგნებული მოსახლეობა, ძალიან მშვიდობიანი და საკმაოდ კარგად იცის, რომ ვართ იმ გეოპოლიტიკურ სიტუაციაში, რომელიც არ გვ...