პროევროპული აქციის მონაწილეები ევროპის მოედნიდან დაიძრნენ და სანაპიროს გავლით პარლამენტის შენობისკენ გაემართნენ. დემონსტრანტები ხელახალ არჩევნებსა და პროევროპული პროტესტისას დაკავებული ადამიანების გათავისუფლებას ითხოვენ. "თავისუფლება რეჟიმის ტყვეებს", "ცეცხლი ოლიგარქიას", - ისმის შეძახილები. три საპროტესტო დემონსტრაციები საქართველოს ქალაქებში უკვე 80 დღეა, ყოველდღე იმართება. პროტესტის უწყვეტი ტალღა მოჰყვა „ქართული ოცნების“ განცხადებას, რომლის თანახმადაც, მათ გადაწყვიტეს, რომ „2028 წლამდე“ დღის წესრიგში არ დააყენონ ევროკავშირთან გაწევრებაზე მოლაპარაკებების გახსნა. ეს ნაბიჯი საზოგადოების მნიშვნელოვანმა ნაწილმა აღიქვა პროდასავლური საგარეო კურსის რუსეთისკენ შებრუნების საბოლოო წერტილად და უკრაინის პრეზიდენტ ვიქტორ იანუკოვიჩის მიერ 2014 წელს მიღებული გადაწყვეტილების ანალოგად. ამ ხნის განმავლობაში მილიარდერ ბიძინა ივანიშვილის „ქართული ოცნების“ კონტროლირებულმა სახელმწიფო სტრუქტურებმა დააკავეს 400-ზე მეტი მოქალაქე, მათგან 50-ზე მეტი სისხლის სამართლის წესით. ისინი კვლავ პატიმრობაში არიან. აქციები არაერთხელ დაშალეს და დაარბიეს ძალის გამოყენებით. დაკავებისას, იზოლატორში გადაყვანისას და გადაყვანის შემდეგ იძალადეს დემონსტრანტებზე, მათ შორის პოლიტიკოსებზე. დემონსტრანტების გარდა, ფიზიკურად გაუსწორდნენ მედიის ათობით წარმომადგენელს. პოლიციელისათვის სილის გარტყმის გამო „პოლიციელზე თავდასხმის“ ბრალდებით დაპატიმრებულია მედიაგამოცემების, „ბათუმელებისა“და „ნეტგაზეთის“ დამფუძნებელი მზია ამაღლობელი, რომელიც ციხეში უკვე 35-ე დღეა შიმშილობს. ამ ბრალდებას იურისტები აბსურდულად მიიჩნევენ. პროევროპული აქციების მსვლელობისას ხელისუფლებამ არაერთი საკანონმდებლო ცვლილება განახორციელა, რომლის საფუძველზე, მაგალითად, აიკრძალა აქციებზე სახის დაფარვა. და ეს მაშინ, როდესაც პოლიციელების მიერ ძალადობის ასობით შემთხვევა კვლავაც გამოუძიებელია სწორედ იმ მიზეზით, რომ ისინი აქციებზე ნიღბებით გადაადგილდებიან და სპეციალური საგამოძიებო სამსახური, უწყება, რომელიც სამართალდამცავთა დანაშაულებს იძიებს, ამბობს, რომ მათი იდენტიფიცირების შესაძლებლობა არ არსებობს. ასევე აიკრძალა ფეიერვერკის გამოყენება და ლაზერის მინათება. კანონში შეტანილი ცვლილებების თანახმად, აიკრძალა აქციის გამართვა ათეულობით საავტომობილო გზაზე, გზების „სტრატეგიული ობიექტების“ ნუსხაში დამატებით; მიხეილ ყაველაშვილმა 6 თებერვალს მოაწერა ხელი კანონთა პაკეტს, რომელიც იმავე დღეს მიიღო „ქართული ოცნების“ სადავო პარლამენტმა და შეკრება-მანიფესტაციების წესები და ადმინისტრაციული პასუხისმგებლობა გაამკაცრა. ასევე ნახეთ რა უნდა იცოდე, თუ პოლიციამ ჯარიმა გამოგიწერა, მაგალითად, გზის გადაკეტვის გამო ...