15 თებერვალს მიუნხენის უსაფრთხოების კონფერენციის დროს ასობით დემონსტრანტმა გამართა საპროტესტო აქცია. ისინი მოითხოვენ ადამიანის უფლებების პატივისცემას და სიძულვილისა და ომის წინააღმდეგ გამოდიან. დემონსტრაციების თემებია დემოკრატიის გაძლიერება, მრავალფეროვნება და განიარაღება, რის ფონზეც წამყვანი პოლიტიკოსები მთელი მსოფლიოდან მსჯელობდნენ უსაფრთხოებისა და სამხედრო საკითხებზე. მიუნხენის ხელისუფლებამ შექმნა უსაფრთხოების ზონა სასტუმრო Bayerischer Hof-ის ირგვლივ, სადაც კონფერენცია იმართება. ქალაქის თავზე ამ დღეებში საერთოდ აიკრძალა ფრენა, არ შეიძლება უპილოტო საფრენი მოწყობილობების გამოყენება. კონფერენციის - რომელიც 13 თებერვალს დაიწყო და 16-ში დასრულდება - უსაფრთხოების უზრუნველსაყოფად დაახლოებით 5000 პოლიციელი იყო მობილიზებული. გაძლიერება გამოიძახეს გერმანიის სხვა ნაწილებიდან და ავსტრიიდან. პოლიციის მონაცემებით, შტახუსის მოედანზე, Bayerischer Hof-იდან დაახლოებით 500 მეტრში, 1200-მდე ადამიანი შეიკრიბა. დემონსტრანტებს უნდა გაევლოთ ქალაქის ცენტრი მარიენპლაცამდე. პოლიციის ცნობით, კიდევ ერთი მსვლელობა კიონიგსპლაციდან ჩრდილოეთისკენ უნდა დაწყებულიყო, სადაც შუადღისთვის 600-მდე ადამიანი იყო შეკრებილი. ოდეონსპლაცზე კიდევ ერთი მორიგი საპროტესტო აქცია გაიმართა. სხვადასხვა საპროტესტო აქციების მონაწილეებმა შეკრების ადგილის გარშემო წრე შეკრეს. აქციის მონაწილეებმა ასევე შეკრეს ცოცხალი ჯაჭვიც. პოლიციის წარმომადგენელმა თქვა, რომ მოსალოდნელზე ნაკლები დემონსტრანტი გამოვიდა. მისი თქმით, 13 თებერვალს მომხდარმა თავდასხმამ, რომლის დროსაც ქალაქში, პროფკავშირების წევრების დემონსტრაციაში მანქანა შევარდა, რასაც ორი ადამიანი, მათ შორის ერთი ბავშვი, ემსხვერპლა, ხოლო რამდენიმე ათეული დაშავდა, შეიძლება აიძულა ხალხი, თავი შეეკავებინათ გამოსვლისგან. ...