აშშ-ის სახელმწიფო მდივანმა მარკო რუბიომ და ისრაელის პრემიერ-მინისტრმა ბენიამინ ნეთანიაჰუმ 16 თებერვალს ერთად გამოსვლისას წარმოადგინეს ერთიანი ფრონტი საერთო მტრების წინააღმდეგ და მუქარა გამოთქვეს, რომ ჰამასის (აშშ-სა და ევროკავშირში ტერორისტულად გამოცხადებული დაჯგუფება) მიმართ “გახსნიან ჯოჯოხეთის კარს”, ხოლო ირანის წინააღმდეგ “საქმეს მოათავებენ”. ეს მათ გამოაცხადეს ჟურნალისტების წინაშე იერუსალიმში, სადაც რუბიომ, როგორც სახელმწიფო მდივანმა ტრამპის ადმინისტრაციაში, ახლო აღმოსავლეთში თავისი პირველი მოგზაურობა დაიწყო. „ჰამასი ვერ გააგრძელებს არსებობას, როგორც სამხედრო ან სამთავრობო ძალა...ისინი უნდა განადგურდნენ“, - თქვა რუბიომ პალესტინელთა ისლამისტურ გაერთიანებაზე, რომელიც ღაზის სექტორში 15 თვე ებრძოდა ისრაელს, სანამ 19 იანვარს ძალაში არ შევიდა ცეცხლის შეწყვეტის შეთანხმება. რუბიომ ასევე განაცხადა, რომ ჰამასი ავლენს „ავადმყოფურ გარყვნილებას,“ როცა დაღუპული მძევლების გვამებს არ იძლევა. რუბიოს გვერდზე მდგომმა ნეთანიაჰუმ განაცხადა, რომ ორ მოკავშირეს „საერთო სტრატეგია“ აქვს და „ჯოჯოხეთის კარიბჭე“ გაიხსნება, თუ ყველა მძევალი, რომლებიც ღაზაში ჰყავთ დაკავებული, არ გათავისუფლდება. ეს გაფრთხილება გამოითქვა ერთ დღეში მას მერე, რაც ჰამასმა კიდევ სამი ისრაელელი მძევალი გაათავისუფლა ისრაელის საპატიმროში მყოფი 369 პალესტინელის სანაცვლოდ. ეს უკვე მეექვსე ასეთი გაცვლა იყო ცეცხლის შეწყვეტის შესახებ შეთანხმების ჩარჩოებში, რომელიც აშშ-ის, კატარისა და ეგვიპტის შუამავლობით დაიდო. ისრაელი და ჰამასი ერთმანეთს ადანაშაულებენ ზავის პირობების დარღვევაში. 16 თებერვალს ჰამასმა განაცხადა, რომ ისრაელის საჰაერო თავდასხმის შედეგად სამი პოლიციელი დაიღუპა რაფაჰში, ღაზის სამხრეთში, რასაც მან „ ცეცხლის შეწყვეტის შესახებ შეთანხმების“ სერიოზული დარღვევა“ უწოდა. ისრაელმა განაცხადა, რომ დაარტყა რამდენიმე „შეიარაღებულ პირს“ ღაზის სამხრეთში. ეს ღაზაში ისრაელის, სულ მცირე, მეორე საჰაერო დარტყმა იყო ცეცხლის შეწყვეტის დაწყების შემდეგ. აშშ-ის პრეზიდენტმა დონალდ ტრამპმა ადრე წამოაყენა წინადადება, რომ კონტროლს დააწესებდა ღაზაზე და მის ორ მილიონზე მეტ მოსახლეს სხვაგან გადაასახლებდნენ - წინადადება ფართო განხილვისა და კრიტიკის საგანი გახდა. ნეთანიაჰუმ თქვა, რომ ტრამპის თამამი ხედვა განიხილეს და „ვიმუშავებთ მასზე, რათა ეს ხედვა რეალობად იქცეს“. ისრაელის პრემიერ-მინისტრმა ისიც განაცხადა, რომ ღაზელებს უნდა მიეცეთ წასვლის არჩევანი. ტრამპის სქემის დეტალები არაა ცნობილი, მაგრამ მან თქვა, რომ ღაზის მოსახლეობა შეიძლება გადაასახლონ იორდანიასა და ეგვიპტეში. ვაშინგტონმა ადრე გამოაცხადა, რომ ღიაა არაბული ქვეყნების სხვა ალტერნატიული წინადადებებისთვის, მაგრამ რუბიომ დააზუსტა, რომ ამ ეტაპზე არსებობს მხოლოდ ტრამპის გეგმა. საერ...