დაკავებულების ქართული მხარისთვის გადმოცემას ადასტურებს საქართველოს სახელმწიფო უსაფრთხოების სამსახურიც: „კახა წეველიძის და გიორგი ჩიტაძის უკანონო პატიმრობიდან გათავისუფლების პროცესში აქტიურად გამოიყენებოდა როგორც საქართველოში ევროკავშირის მონიტორინგის მისიის (EUMM) მიერ ოპერირებადი „ცხელი ხაზის“ მექანიზმი, ისე ცენტრალური ხელისუფლების ხელთ არსებული ყველა რელევანტური ინსტრუმენტი“. დე ფაქტო უწყების პრესსამსახურის ცნობით, გორის მუნიციპალიტეტის სოფელ ყელქცეულში მცხოვრები, 1962 წელს დაბადებული გიორგი ჩიტაძე და 1974 წელს დაბადებული კახა წეველიძე 16 თებერვალს სამხრეთ ოსეთის ე.წ. სასაზღვრო პოლიციის თანამშრომლებმა დააკავეს. „დადგინდა, რომ ნასვამ მდგომარეობაში მყოფმა უცხოელებმა ტრაქტორით უნებლიედ გადაკვეთეს სამხრეთ ოსეთ-საქართველოს საზღვარი ზნაურის რაიონის სოფელ მუგუთში. სამშაბათს, 18 თებერვალს, ისინი სასოფლო-სამეურნეო ტექნიკასთან ერთად სამხრეთ ოსეთის რესპუბლიკიდან გააძევეს“, - წერია ე.წ. კაგებეს მიერ გავრცელებულ ცნობაში. სოფელ დირბის მახლობლად, ოკუპირებულ ტერიტორიაზე, რუსეთის საოკუპაციო ძალების წარმომადგენლების მიერ საქართველოს ორი მოქალაქის დაკავების შესახებ ინფორმაცია სახელმწიფო უსაფრთხოების სამსახურმა 16 თებერვალს გაავრცელა. ამჟამად ცხინვალის ციხეში უკანონო პატიმრობაში რჩება საქართველოს ექვსი მოქალაქე. ...