„ამ ეტაპზე უკრაინაში არჩევნების შესახებ ლაპარაკი სასარგებლოა აგრესორისთვის, რომელსაც ვითარების დესტაბილიზაცია სურს“, თქვა ოთხშაბათს რადიო თავისუფლებისთვის მიცემულ ინტერვიუში უკრაინის ცენტრალური საარჩევნო კომისიის თავმჯდომარემ, ოლეჰ დიდენკომ. მისი თქმით, ამ საკითხს წამოჭრიან იმისთვის, რომ „ძირი გამოუთხარონ უკრაინის მთავრობის ლეგიტიმურობას, დაასუსტონ მთავრობის მიმართ ნდობა და დაასუსტონ კიევისადმი საერთაშორისო პარტნიორების მხარდაჭერა“. დიდენკომ ამას უწოდა „ჰიბრიდული ომი“, რომელსაც „მტერი აქტიურად იყენებს“. ცესკოს თავმჯდომარის სიტყვებით, უკრაინაში არჩევნების ჩატარება „თეორიულად შესაძლებელია“, მაგრამ ამისთვის აუცილებელია დამყარდეს მშვიდობა და გაუქმდეს საგანგებო მდგომარეობა. ასევე ნახეთ აშშ-ს უკრაინაში არჩევნები სურს: მშვიდობისკენ წინსვლა თუ საჩუქარი პუტინს? „დღესდღეობით არც ფაქტობრივი და არც იურიდიული საფუძველი არა გვაქვს არჩევნებზე სალაპარაკოდ. ამჟამად საგანგებო მდგომარეობა გვაქვს გამოცხადებული. საგანგებო მდგომარეობის პირობებში არ ხდება არჩევნების ორგანიზება ან ჩატარება,“ თქვა დიდენკომ. ის ასევე შეეხო ფოსტის მეშვეობით ან ელექტრონული გზით კენჭისყრის ჩატარების შესაძლებლობას. ცესკოს თავმჯდომარის თქმით, ომით გაჩანაგებულ ქვეყანაში ძალზე რთული იქნებოდა ამის გაკეთება და ეს დამატებით ეჭვებს გააჩენდა კენჭისყრის სანდოობის მიმართ. თავის მხრივ, ეს ქვეყანაში ვითარების დესტაბილიზაციის საფრთხეს შეიცავს. ასევე ნახეთ ტრამპმა ზელენსკის "დიქტატორი" და "საშუალოდ წარმატებული კომიკოსი" უწოდა დღესვე, უფრო ადრე, აშშ-ის პრეზიდენტმა დონალდ ტრამპმა გააკრიტიკა უკრაინის პრეზიდენტი ვოლოდიმირ ზელენსკი და მას უწოდა „დიქტატორი, რომელიც არ აურჩევიათ“. მსგავსი ბრალდება არაერთხელ წაუყენა ზელენსკის რუსეთის პრეზიდენტმა ვლადიმირ პუტინმა. უკრაინაში საპრეზიდენტო არჩევნები, რომელიც 2024 წლის გაზაფხულზე უნდა ჩატარებულიყო, არ გამართულა ქვეყანაში მიმდინარე ომთან დაკავშირებით მოქმედი საგანგებო მდგომარეობის გამო. ...