აშშ-ის ვიცე-პრეზიდენტმა ჯეი დი ვენსმა ოთხშაბათს გამოცემა National Pulse-ისთვის მიცემულ ინტერვიუში მწვავედ გააკრიტიკა უკრაინის პრეზიდენტი ვოლოდიმირ ზელენსკი აშშ-ის პრეზიდენტ დონალდ ტრამპის კრიტიკისთვის. ვენსმა ზელენსკის მიდგომას უწოდა „სამარცხვინო“ და კონტრპროდუქტიული და თქვა, რომ ასეთმა ტაქტიკამ შესაძლოა საფრთხე შეუქმნას უკრაინის მიმართ მისი მთავარი მოკავშირის დამოკიდებულებას. ვენსმა ზელენსკის მოუწოდა, თავი შეიკავოს საჯარო პროტესტისგან. ასევე ნახეთ ზელენსკი ტრამპის სამიზნედ - რატომ დაიძაბა უკრაინისა და აშშ-ის ლიდერების ურთიერთობა? მანამდე უკრაინის პრეზიდენტმა ტრამპის ადმინისტრაცია გააკრიტიკა იმისთვის, რომ 18 თებერვალს საუდის არაბეთში გამართულ შეხვედრაზე უკრაინა არ მიუწვევიათ. სამშაბათს ერ-რიადში შედგა აშშ-ისა და რუსეთის მაღალი რანგის შეხვედრა პირველად მას შემდეგ, რაც რუსეთმა უკრაინაში ფართო მასშტაბის ომი დაიწყო 2022 წლის თებერვალში. ვენსის თქმით, ზელენსკი „თავს ესხმის იმ ერთადერთ მიზეზს, რა მიზეზითაც ეს ქვეყანა [უკრაინა] არსებობს, საჯაროდ, პირდაპირ ახლა. და ეს სამარცხვინოა. ეს ის არ არის, რაც შეერთებული შტატების პრეზიდენტს დაარწმუნებს. სინამდვილეში ამას საპირისპირო ეფექტი ექნება“. ასევე ნახეთ ზელენსკი: აშშ პუტინს ეხმარება მრავალწლიანი იზოლაციიდან გამოსვლაში 19 თებერვალს დონალდ ტრამპმა ზელენსკის ბრალი დასდო, რომ უკრაინის ლიდერი „უარს ამბობს არჩევნების ჩატარებაზე“. „დიქტატორი არჩევნების გარეშე“, დაწერა ტრამპმა თავის სოცქსელ Truth Social-ში, „ზელენსკიმ ჯობია იმოქმედოს სწრაფად, თორემ მალე ქვეყანაც აღარ ექნება. ამასობაში, ჩვენ რუსეთთან წარმატებით ვაწარმოებთ მოლაპარაკებებს ომის დასრულებაზე, რისი გაკეთებაც, ყველანი აღიარებენ, მხოლოდ ტრამპს და ტრამპის ადმინისტრაციას შეუძლია“. გუშინ დონალდ ტრამპმა თქვა, რომ ვოლოდიმირ ზელენსკის უკრაინის მოსახლეობის მხოლოდ 4% უჭერს მხარს, რაც ეწინააღმდეგება სოციალური გამოკითხვების შედეგებს. ასევე ნახეთ ზელენსკი: უკრაინაში გაწეული ხარჯების შესახებ ტრამპის მიერ დასახელებული მონაცემები არასწორია ...